ទាហានម៉ាដាហ្គាស្កាមួយចំនួន បានផ្គើននឹងបទបញ្ជា ហើយទៅចូលរួមជាមួយក្រុមបាតុករប្រឆាំងរដ្ឋាភិបាលរាប់ពាន់នាក់ដែលបានប្រមូលផ្តុំគ្នា នៅក្នុងរដ្ឋធានី Antananarivo ខណៈដែលបាតុកម្មប្រឆាំងនឹងការគ្រប់គ្រងរបស់ប្រធានាធិបតី លោក Andry Rajoelina កាន់តែមានសន្ទុះខ្លាំងឡើងៗ។

ក្រុមបាតុករដឹកនាំដោយយុវជន បានចូលទៅក្នុងទីលាន ១៣ ឧសភា (May 13 Square) របស់រដ្ឋធានីនេះ កាលពីថ្ងៃសៅរ៍ ដោយនេះជាលើកដំបូងនៃការប្រមូលផ្តុំដ៏ធំបំផុតមួយ គិតចាប់តាំងពីចលនាតវ៉ាជំរុញដោយអ្វីដែលត្រូវបានគេស្គាល់ថា ជាការតវ៉ាយុវជនជំនាន់ក្រោយ (Gen Z) នៅក្នុងប្រទេសកេនយ៉ា និងនេប៉ាល់ បានផ្ទុះឡើងនៅលើកោះមហាសមុទ្រឥណ្ឌា កាលពីថ្ងៃទី២៥ ខែកញ្ញា។

បន្ទាប់ពីនគរបាលបានប្រើគ្រាប់បែកផ្សេង និងឧស្ម័នបង្ហូរទឹកភ្នែក ដើម្បីព្យាយាមបំបែកហ្វូងបាតករ ទាហានបានទៅដល់កន្លែងប្រមូលផ្ដុំនោះ ជាកន្លែងដែលពួកគេត្រូវបានស្វាគមន៍ដោយសំឡេងអបអរ។ មុននោះ ក្នុងកិច្ចប្រជុំមួយ នៅឯបន្ទាយកងទ័ពជាយក្រុង ទាហាននៅក្នុងអង្គភាពវរជន CAPSAT ដែលមានចំណែកយ៉ាងសំខាន់ នៅក្នុងការឡើងកាន់អំណាចរបស់លោក Rajoelina កាលពីឆ្នាំ២០០៩ បានចេញការអំពាវនាវជាសាធារណៈដ៏កម្រឲ្យមានសាមគ្គីភាព ខណៈដែលក្រុមបាតុករទាមទារឲ្យប្រធានាធិបតីលាលែងពីតំណែង។

ទាហាននៅមូលដ្ឋានក្នុងតំបន់ Soanierana បាននិយាយក្នុងវីដេអូបង្ហោះលើបណ្តាញសង្គមថា៖ «សូមរួមកម្លាំងគ្នា ទាំងយោធា អាវុធហត្ថ និងនគរបាល ហើយបដិសេធមិនបាញ់ប្រហារមិត្តភ័ក្ដិ និងបងប្អូនប្រុសស្រីរបស់យើង»។ ពួកគេបានអំពាវនាវដល់ទាហាននៅអាកាសយានដ្ឋាន «រារាំងយន្តហោះទាំងអស់កុំឲ្យហោះឡើង» និងអ្នកដែលនៅក្នុងស្ថាប័នផ្សេងទៀត «បដិសេធមិនធ្វើតាមបញ្ជាឲ្យបាញ់មិត្តភ័ក្តិរបស់អ្នក»។

វីដេអូដែលផ្សាយដោយប្រព័ន្ធផ្សព្វផ្សាយក្នុងស្រុក បានបង្ហាញឲ្យឃើញទាហានមួយចំនួន បានចាកចេញពីបន្ទាយ ដើម្បីអមក្រុមបាតុករចូលទៅក្នុងទីលាន ១៣ ឧសភា ជាកន្លែងនៃការមានហេតុការណ៍បះបោរនយោបាយជាច្រើនដែលត្រូវបានយាមកាមយ៉ាងតឹងរ៉ឹង និងគ្មានដែនកំណត់ អំឡុងពេលមានភាពចលាចល។

បាតុកម្ម កាលពីថ្ងៃសៅរ៍ គឺជាការជួបជុំតវ៉ាដ៏ធំបំផុត ក្នុងរយៈពេលជាច្រើនថ្ងៃ ជាចលនាដឹកនាំដោយយុវជន ដែលត្រូវបានបញ្ឆេះដោយការខឹងសម្បា ជុំវិញការខ្វះខាតថាមពល និងទឹក ហើយបានវិវត្តទៅជាយុទ្ធនាការប្រឆាំងរដ្ឋាភិបាលយ៉ាងទូលំទូលាយ៕