​បាល់ទាត់៖ ​ក្រុម​ម្ចាស់ផ្ទះ​អារ៉ាប់​រួម Al Jazira បាន​បន្តដំណើរ​ឡើង​ជុំ​ទី២ មិន​លំបាក​នៃ​ការប្រកួត​ពានរង្វាន់​ជើងឯក​ក្លិប​បាល់ទាត់​ពិភព​លោក FIFA Club World Cup ក្រោយ​យកឈ្នះ​ក្លិប​តា​ហ៊ី​ទី​របស់​ទ្វីបអូសេអានី AS Pirae ៤-១​។ ​​AS Pirae បាន​ហោះហើរ​ចំងាយ​ជាង ១ម៉ឺន​គីឡូម៉ែត្រ​ដើម្បី​មក​បង្ហាញខ្លួន​លើកដំបូង​ក្នុង​ព្រឹត្តិការណ៍​នេះ​ ក្នុងនាម​ជា​ក្រុម​តំណាង​ជើងឯក​អូ​សេ​អា​នី Auckland City របស់​នូ​វែ​ហ្ស៊ី​ឡង់​ដែល​បាន​ដកខ្លួន​។

​​តែ​បទពិសោធ​ថ្មី​របស់​ពួកគេ​ត្រូវបានក្រុម​ម្ចាស់ផ្ទះ​ស្វាគមន៍​ដោយ​គ្រាប់​បាល់ ៣គ្រាប់​ក្នុង​វគ្គ​ទី១ មុនពេល​ដែលវគ្គ​ទី២ តាម​បាន​មួយ​គ្រាប់​វិញ​ដែលជា​គ្រាប់​បាល់​ចូល​ទី​ខ្លួនឯង​របស់ Al Jazira ទៅទៀត​។ ​​មិនទាន់​អស់​នៅឡើយ Al Jazira ក៏​បន្ថែម​គ្រាប់​ជ័យជំនះ ៤-១ ដោយ Abdoulay Diaby​។ ​​ជ័យជំនះ​នេះ​ធ្វើឱ្យ​ក្រុម​ម្ចាស់ផ្ទះ​អារ៉ាប់​រួម Al Jazira បន្តដំណើរ​ឡើង​ជុំ​ទី២ ជួប​ជាមួយ​ក្រុម​ជើងឯក​អាស៊ី AFC Champions League គឺ​ក្លិប​អារ៉ាប៊ីសាអ៊ូឌីត Al Hilal​។ ​​ចំណែក​ក្រុម​ជើងឯក​អឺរ៉ុប UEFA Champions League តោ​ខៀវ Chelsea រង់ចាំ​ជួប​នៅ​វគ្គ​ពាក់កណ្តាល​ផ្តាច់ព្រ័ត្រ​។

​​រីឯ​នៅ​កីឡដ្ឋាន Al Nahyan នឹង​ទទួល​ការប្រកួត​ជុំ​ទី២ រវាង​ក្លិប​ជើងឯក​ទ្វីបអាហ្វ្រិក Al Ahly របស់​អេ​ហ្ស៊ី​ប និង​ក្រុម​ជើងឯក​អាមេរិក​កណ្តាល Monterrey របស់​ម៉ិ​ក​ស៊ិ​ក​។ ​ក្រុម​ឈ្នះ​នឹង​ឡើង​ជួប​ជាមួយ​ក្រុម​ជើងឯក​អាមេរិក​ខាងត្បូង Palmeiras របស់​ប្រេ​ស៊ី​ល​។ ​វគ្គ​ផ្តាច់ព្រ័ត្រ​នឹងធ្វើ​ឡើង​នៅ​ថ្ងៃទី១២ ខែកុម្ភៈ​នេះ​៕

​អត្ថបទ​៖​នាង សុភា​វុ​ធ