នៅព្រឹកថ្ងៃទី១២ ខែតុលា ឆ្នាំ២០២៥នេះ លោកចេង មុនីរ៉ា អភិបាលខណ្ឌច្បារអំពៅ បាន​ដឹក​នាំ​ក្រុម​មន្ត្រី នៃរដ្ឋបាលខណ្ឌ និងសង្កាត់ចុះទៅសួរសុខទុក្ខ និងនាំយកអំណោយជាស្បៀងអាហារ ជូន​ដល់បងប្អូនប្រជាពលរដ្ឋប្រមាណជាង ៣០០ គ្រួសារ កំពុងរស់នៅតំបន់ផ្សារបឹងព្រលិត ស្ថិត​ក្នុង​ភូមិ​អូរអណ្តូងទី១ សង្កាត់ព្រែកប្រា ខណ្ឌច្បារអំពៅ ដែលកំពុងរង​ផល​ប៉ះពាល់​ដោយ​បញ្ហា​ទឹក​លិច​ផ្លូវ ​និងលំនៅឋាន។

ការចុះសួរសុខទុក្ខនេះ អាជ្ញាធរបានចុះដល់តាមខ្នងផ្ទះរបស់បងប្អូនតែម្តង ដើម្បី​សំណេះ​សំណាល ​និងពិនិត្យស្ថានភាពជាក់ស្តែង អំពីទុក្ខលំបាក នៃការរស់នៅរបស់បងប្អូនប្រជាពលរដ្ឋ បន្ទាប់​ពី​មួយរយៈក្រោយមកនេះ អាជ្ញាធរក៏បាននិងកំពុងខ្នះខ្នែងយកចិត្តទុកដាក់បំផុត ដើម្បី​ដោះ​ស្រាយ​បញ្ហាទឹកលិចផ្លូវនិងលំនៅឋាននៅតំបន់ដែលបងប្អូនកំពុងជួបប្រទះ។

លោកចេង មុនីរ៉ា អភិបាលខណ្ឌច្បារអំពៅ បានផ្តែផ្តាំ​ផ្ញើ​ពាក្យ​សួរសុខ​ទុក្ខ​ពីសំ​ណាក់​ឯកឧ​ត្តម​ ឃួង ស្រេង អភិបាលរាជធានីភ្នំពេញ និងលោកជំទាវ ដែលឯកឧត្ត​ម​តែង​តែ​គិត​គូរ​អំពី​សុខ​ទុក្ខ​របស់​បង​ប្អូនប្រជាពលរដ្ឋ ពិសេសនៅរៀងរាល់ពេលដែលបងប្អូនជួបការលំបាក។

លោកអភិបាលខណ្ឌ បានណែនាំឲ្យបងប្អូនប្រជាពលរដ្ឋ ត្រូវថែទាំសុខភាពឲ្យបានល្អ , ថែទាំ​អនាម័យ នៃការរស់នៅ ពិសេសអាណាព្យាបាលដែលមានកូនតូចៗ ឬមនុស្សចាស់ជរា សូម​មាន​ការ​ប្រុង​ប្រយ័ត្នចំពោះទឹកដែលកំពុងជន់លិច ជៀសវាងការដើរដួលរអិល ឬជួប​គ្រោះថ្នា​ក់​ជាយ​ថា​ហេតុ​ណាមួយ។

បច្ចុប្បន្ននេះ កម្លាំងអាជ្ញាធរ បានខិតខំទាំងយប់ទាំងថ្ងៃ ក្នុងការប្រើគ្រប់វិធីសាស្ត្រ ដើម្បី​ព្យាយាម​រំដោះ​ទឹក​ចេញពីតំបន់ខាងលើ ឲ្យបានលឿនបំផុតតាមដែលអាចធ្វើទៅបាន ដើម្បីបង្ក​ខណៈ​ងាយ​ស្រួល​ក្នុងជី​វភាពរស់នៅប្រចាំថ្ងៃរបស់បងប្អូនប្រជាពលរដ្ឋ៕ លីហេង