មន្ត្រីជាន់អង្គភាពស៊ីម៉ាក់បានស្នើ និងសំណូមពរដល់រដ្ឋាភិ បាលជប៉ុន តាមរយៈ JICA ដើម្បី​បន្ដ​ជួយ​គាំទ្រ​ដល់វិស័យសកម្ម ភាពកំចាត់មីននៅកម្ពុជា ជាពិសេសគាំទ្រកម្ពុជាក្នុងការងារបោស សម្អាត​មីន​រយៈពេល៥ ឆ្នាំ ក្នុងអណត្តិស្នើសុំបន្តរអនុវត្តអនុសញ្ញាអន្ដរជាតិអូតាវ៉ាដល់ឆ្នាំ ២០៣០ ខាងមុខ។

ការស្នើ​បែបនេះខណៈ ឯកឧត្តម ហេង រតនា ប្រតិភូរាជរដ្ឋាភិបាលទទួល​បន្ទុក​ជា​អគ្គនាយក​អង្គភាព​ស៊ីម៉ាក់ និងក្រុមការងារអង្គភាព CMAC បានទទួលស្វាគមន៍​ដំណើរ​ទស្សន​កិច្ច​ឯកឧត្តម​បណ្ឌិត តាណាកា អាគិហិកុ ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA) ដើម្បី​ស្វែង​យល់​ពីកិច្ចប្រតិបត្តិការបោសសម្អាតគ្រាប់មីន និងសំណល់យុទ្ធភណ្ឌសង្គ្រាមនៅកម្ពុជា និយាយ​ជារួ​មនិងនិយាយ ដោយឡែកសមិទ្ធផលដែលអង្គភាពCMACសម្រេចបាន។ ជាពិសេស​ក្នុង​រយៈ​ពេល​ជាង​២៧​ឆ្នាំ មកនេះ JICA បានផ្តល់ជូនរាជ រដ្ឋា ភិបាលកម្ពុជានូវសម្ភារបច្ចេកទេស​បោស​សម្អាតមីនជាច្រើនប្រភេទ រួមទាំងគ្រឿងចក្រកម្ទេចមីនធុនធ្ងន់មានចំនួនជាង៥០គ្រឿង ។

ឯកឧត្តម ហេង រតនា បានជម្រាបជូនឯកឧត្តមបណ្ឌិតអំពីប្រវត្តិសង្គ្រាមនៅកម្ពុជា បញ្ហា​គ្រាប់​មីន​ និង​យុទ្ធភណ្ឌមិនទាន់ផ្ទុះដែលជាសំណល់យុទ្ធភណ្ឌសង្គ្រាម ដំណើរការនៃការកសាងសន្តិភាព ការ​អភិវឌ្ឍប្រទេសឡើងវិញក្រោយសង្គ្រាមត្រូវបានបញ្ចប់ ព្រមទាំងបានចែករំលែកបទពិសោធ និង​កិច្ចខិតខំប្រឹងប្រែងរបស់អង្គភាព CMACលើការងារ​បោស​សម្អាត​មីន និង​សំណល់​យុទ្ធ​ភណ្ឌ​សង្គ្រាម​នៅក​ម្ពុជា។ ទន្ទឹមនឹងនេះ ឯកឧត្តមក៏បានថ្លែងអំណរ​គុណ​យ៉ាង​ជ្រាល​ជ្រៅ​ចំពោះ​រដ្ឋាភិបាល និង​ប្រជាជនជប៉ុន ជាពិសេសមន្ត្រីថ្នាក់ដឹកនាំ JICA​ គ្រប់​ឋានានុក្រម ដែល​តែង​តែ​ផ្ដល់​ការ​គាំទ្រ​ និងជំនួយដល់វិស័យសកម្មភាពកំចាត់មីនរបស់អង្គភាព CMAC ជាពិសេស​ការ​ផ្ដល់​ជំនួយ​គាំទ្រ​ការកសាងអគារហ្វឹកហ្វឺននៅខេត្តកំពង់ឆ្នាំង និងសារមន្ទីរតេជោស​ន្ដិភាព​នៅ​ខេត្ត​សៀមរាប សម្រាប់ដាក់បង្ហាញរូបភាពប្រវត្តិសាស្ត្រសង្គ្រាម ប្រវត្តិជនរងគ្រោះដោយសារសង្គ្រាម ព្រមទាំងសំណល់គ្រាប់មីននិងគ្រាប់យុទ្ធភណ្ឌសង្គ្រាម ដើម្បីរំលឹកការចង ចាំនៃមរតកសង្គ្រាម និងតម្លៃមហាសាលនៃសន្តិភាព ។

ជាការឆ្លើ​យតប ឯកឧត្តមបណ្ឌិត តាណាកា អាគិហិកុ បានកោតសរសើរ និង​វាយ​តម្លៃ​ខ្ពស់​ចំពោះ​កិច្ច​ខិត​ខំប្រឹងប្រែងរបស់CMAC ដែលជាអង្គភាពឈានមុខ​គេ​លើ​ការ​ងារ​បោស​សម្អាត​មីន​នៅ​កម្ពុជា និងបានចូលរួមចំណែក​យ៉ាង​សំខាន់​ក្នុង​ដំណើរ​ការ​កសាង​សន្ដិភាព​តាម​រយៈ​ការ​ចែក​រំលែ​កប​ទពិសោធ និងជំនាញបច្ចេកទេសដល់បណ្ដាប្រទេសដែលរងគ្រោះដោយ សារសង្គ្រាម​នៅ​ជុំវិញ​ពិភពលោក។ ឯកឧត្តមបណ្ឌិត ក៏បានកោតសរសើរចំពោះ​គំនិត​ផ្តួច​ផ្តើមក្នុ​ង​ការ​បង្កើត​សារ​មន្ទីរ​តេជោ​សន្តិភាពដែលជាជំនួយរបស់រដ្ឋាភិ បាលជប៉ុន សម្រាប់អប់រំដល់​អ្នក​ជំនាន់​ក្រោយ​ពី​បញ្ហា​សង្រ្គាម និង ការកសាងសន្តិភាពតា​មរយៈ​ការ​បោស​សម្អាត​គ្រាប់​មីន​ និង​សំណល់​យុទ្ធភ​ណ្ឌស​ង្រ្គាម។​ បន្ថែមពីនេះឯកឧត្តម បានលើកឡើងពីការខិតខំប្រឹងប្រែងរបស់អង្គភាព CMAC ក្នុ​ងស្រាវជ្រាវការប្រើប្រាស់បច្ចេកវិទ្យាថ្មីៗក្នុងវិស័យបោស សម្អាតមីនជាមួយអ្នកជំនាញជប៉ុន ដូចជាម៉ាស៊ីនរាវមីនប្រភេទ ALIS ក៏ដូចជាការបញ្ញាសិប្បនិម្មិតជាដើម។ បន្ថែមពីនេះ ឯក​ឧត្តម​ក៏​បានប្ដេជ្ញាចិត្តក្នុងការបន្តគាំទ្ររបស់ JICAក្នុងការសហ ការជាមួយអង្គភាពCMAC ក្នុងការ​ស្រាវ​ជ្រាវ និងប្រើប្រាស់បច្ចេកវិទ្យាថ្មីៗ ដើម្បីបោស សម្អាតនៅតំប​ន់ដែ​លរ​ង​ប៉ះ​ពាល់​ដោយ​សារ​គ្រាប់​មីន និង​សំណល់យុទ្ធភណ្ឌសង្គ្រាម ដើម្បីផ្តល់សុខសុវត្ថិភាពជូនប្រជាពលរដ្ឋ និងការអភិវឌ្ឍ​សេដ្ឋកិច្ច​សង្គម។ លើសពីនេះឯកឧត្តមមានការភ្ញាក់ផ្អើល និង បានកោតសរសើររាជ រដ្ឋាភិបាល​កម្ពុ​ជា​ក្នុងរយៈពេល១០ឆ្នាំចុង ក្រោយនេះគឺមានការអភិវឌ្ឍន៍យ៉ាងខ្លាំងគួរអោយកត់សម្គាល់ ដូចជា ព្រលានយន្តហោះថ្មី និង ហេដ្ឋារចនាសម្ព័ន្ធនានា៕ អត្ថបទ៖ ភារម្យ