អាជ្ញាធរ បានឲ្យដឹងកាលពីថ្ងៃសៅរ៍ (ទី១១ ខែតុលា)ថា មនុស្សយ៉ាងហោចណាស់ ៤២នាក់ បានបាត់បង់ជីវិត ហើយ ២៧នាក់ផ្សេងទៀត កំពុងបាត់ខ្លួន បន្ទាប់ពីភ្លៀងធ្លាក់ខ្លាំង បានបង្កជាទឹកជំនន់យ៉ាងធំ នៅទូទាំងតំបន់ជាច្រើននៃប្រទេសម៉ិកស៊ិក។

នៅក្នុងសេចក្តីថ្លែងការណ៍មួយ ស្ថាប័នសម្របសម្រួលការពារជនស៊ីវិលជាតិ (CNPC) របស់ម៉ិកស៊ិក បានឲ្យដឹងថា ភ្លៀងធ្លាក់ខ្លាំងបានបណ្តាលឲ្យមានទឹកជំនន់បំផ្លិចបំផ្លាញ នៅក្នុងរដ្ឋ Veracruz, Puebla, Hidalgo, Queretaro និង San Luis Potosi។

យោងតាមការវាយតម្លៃដំបូង បានបង្ហាញថា មនុស្ស ៤២នាក់យ៉ាងតិច បានបាត់បង់ជីវិតនៅក្នុងគ្រោះទឹកជំនន់ ខណៈដែលក្រុមស្វែងរក និងជួយសង្គ្រោះ នៅតែបន្តធ្វើការយ៉ាងយកចិត្តទុកដាក់ ដើម្បីតាមរកអ្នកបាត់ខ្លួនចំនួន ២៧នាក់។

ប្រធានាធិបតីម៉ិកស៊ិក លោកស្រី Claudia Sheinbaum បានបើកកិច្ចប្រជុំអនឡាញ ជាមួយអភិបាលនៃរដ្ឋដែលរងផលប៉ះពាល់ខ្លាំងបំផុតទាំង ៥ នោះ ដើម្បីសម្របសម្រួលកិច្ចប្រឹងប្រែងឆ្លើយតបបន្ទាន់។ លោកស្រី Sheinbaum បាននិយាយបន្ទាប់ពីកិច្ចប្រជុំនោះថា៖ «គ្មានជនរងគ្រោះណាម្នាក់ នឹងត្រូវបានទុកចោលដោយគ្មានការផ្ដល់ជំនួយនោះទេ។ ក្រុម និងមន្ត្រី មកពីរដ្ឋាភិបាលសហព័ន្ធ ត្រូវបានដាក់ពង្រាយ ដើម្បីបើកផ្លូវឡើងវិញ និងផ្តល់ជំនួយដល់សាធារណជន»។

យោងតាមប្រព័ន្ធផ្សព្វផ្សាយម៉ិកស៊ិក បានឲ្យដឹងថា មនុស្សរាប់ពាន់នាក់ត្រូវគ្មានអគ្គិសនីប្រើប្រាស់ ជាអ្វីដែលត្រូវបានពិពណ៌នាថា ជាគ្រោះមហន្តរាយទឹកជំនន់ដ៏ធ្ងន់ធ្ងរបំផុតមួយរបស់ប្រទេស ក្នុងប៉ុន្មានឆ្នាំថ្មីៗនេះ។ ហើយអាជ្ញាធរបារម្ភថា ស្ថានការណ៍អាចកាន់តែអាក្រក់ទៅៗ ដោយសារបំណាក់ដីនៅជម្រាលភ្នំ និងទឹកទន្លេឡើងខ្ពស់ខ្លាំង ដែលបានធ្វើឲ្យការបំផ្លិចបំផ្លាញមានរួចហើយកាន់តែធ្ងន់ធ្ងរឡើងៗ។ ភ្លៀងធ្លាក់ខ្លាំងនៅតែបន្តមាននៅតំបន់ដែលរងផលប៉ះពាល់ជាច្រើន ដោយផ្លូវហាយវេ ដងវិថី និងផ្ទះសម្បែង នៅតែត្រូវបានជន់លិច៕