ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យ (១២ តុលា) ថា លោកអាចនឹងផ្តល់មីស៊ីលតម្រង់គោលដៅ Tomahawk រយៈចម្ងាយឆ្ងាយ ដែលអ៊ុយក្រែន អាចប្រើប្រាស់បាន ប្រសិនបើប្រធានាធិបតីរុស្ស៊ី លោក Vladimir Putin មិនព្រមបញ្ចប់សង្រ្គាមនៅអ៊ុយក្រែនទេនោះ។

ការព្រមានជាថ្មីនេះកើតឡើងពេលលោកធ្វើដំណើរទៅអ៊ីស្រាអែល ហើយលោក Trump បន្តថា រូបលោក និងប្រធានាធិបតីអ៊ុយក្រែន Volodymyr Zelenskyy បានពិភាក្សាតាមទូរសព្ទកាលពីចុងសប្ដាហ៍កន្លងទៅ ពីសំណើរបស់ទីក្រុងគីវ សម្រាប់សព្វាវុធទាំងឡាយ រួមទាំងមីស៊ីល Tomahawk ផងដែរ។

មីស៊ីល Tomahawk មានរយៈចម្ងាយ ២.៥០០គីឡូម៉ែត្រ ពោលគឺឆ្ងាយល្មមអាចបាញ់ចូលជ្រៅក្នុងទឹកដីរុស្ស៊ី រួមទាំងទីក្រុងមូស្គូ។ វិមានក្រឹមឡាំង បានព្រមានប្រឆាំងនឹងការផ្តល់ Tomahawk ណាមួយដល់អ៊ុយក្រែន ហើយលោក Trump កាលពីថ្ងៃអាទិត្យបាននិយាយថា សព្វាវុធទាំងនេះនឹងជា "ជំហានថ្មីនៃការឈ្លានពាន" ប្រសិនបើត្រូវប្រើក្នុងសង្រ្គាម។

លោក Trump បាននិយាយថា អាមេរិកនឹងមិនលក់មីស៊ីលដោយផ្ទាល់ទៅអ៊ុយក្រែនទេ ប៉ុន្តែនឹងឱ្យទៅអង្គការណាតូ ដែលបន្ទាប់មកអាចបញ្ចូនជាជំនួយយោធាដល់អ៊ុយក្រែន។ ថ្លែងប្រាប់អ្នកសារព័ត៌មានរឿងមីស៊ីល Tomahawk លោក Trump និយាយថា លោកនឹងប្រាប់ទៅមេដឹកនាំរុស្ស៊ី លោក Putin ថា ប្រសិនបើសង្រ្គាមមិនត្រូវបានដោះស្រាយទេនោះ អាមេរិកប្រហែលជាធ្វើរឿងនេះ។ នៅមុននោះ លោក Zelenskyy បានសន្យាថា ប្រសិនបើអាមេរិកឱ្យមីស៊ីល Tomahawk នោះអ៊ុយក្រែននឹងប្រើសម្រាប់តែគោលបំណងយោធាប៉ុណ្ណោះ និងមិនវាយប្រហារជនស៊ីវិលក្នុងទឹកដីរុស្ស៊ីឡើយ៕