រដ្ឋាភិបាលម៉ិកស៊ិក បាននិយាយកាលពីថ្ងៃអាទិត្យ (១២ តុលា) ថា ភ្លៀងធ្លាក់ខ្លាំងជាច្រើនថ្ងៃ និងទឹកជំនន់យ៉ាងគំហុកដោយសារព្យុះត្រូពិកចំនួនពីរគឺព្យុះ Priscilla និង Raymond បានបង្កឱ្យមានបំណាក់ដី និងការជន់លិចយ៉ាងទូលំទូលាយនៅទូទាំងរដ្ឋចំនួន៥ ខណៈមនុស្សយ៉ាងតិច ៤៤នាក់ បានស្លាប់នៅក្នុងប្រទេសនេះ ហើយមួយចំនួននៅតែបាត់ខ្លួន។

សេចក្តីថ្លែងការណ៍របស់រដ្ឋាភិបាលបន្តថា អ្នកស្លាប់ច្រើនជាងគេកើតនៅរដ្ឋ Veracruz បន្ទាប់មកគឺរដ្ឋ Hidalgo រួមទាំង Puebla និង Queretaro ហើយរដ្ឋ San Luis Potosí ក៏រងផលប៉ះពាល់ផងដែរ។ រដ្ឋាភិបាលរបស់ប្រធានាធិបតីម៉ិកស៊ិក លោកស្រី Claudia Sheinbaum កំពុងដាក់ចេញផែនការឆ្លើយតប ដើម្បីគាំទ្រតំបន់ដែលរងផលប៉ះពាល់ចំនួន ១៣៩ទីក្រុង ទូទាំងប្រទេស។

លោកស្រី Sheinbaum បាននិយាយលើបណ្ដាញសង្គម X ថា មន្រ្តីបន្តយកចិត្តទុកដាក់ចំពោះភាពអាសន្ននៅតំបន់រងគ្រោះនានា ដោយមានការសម្របសម្រួលជាមួយអភិបាលរដ្ឋ ក៏ដូចជាអាជ្ញាធរសហព័ន្ធផ្សេងៗ ហើយគណៈកម្មាធិការជាតិសង្គ្រោះបន្ទាន់ កំពុងបើកសម័យប្រជុំរិះរកវិធីដោះស្រាយ។

រូបថតដែលបង្ហោះដោយយោធាម៉ិកស៊ិក បានបង្ហាញឱ្យឃើញហ្វូងមនុស្សដែលត្រូវបានជម្លៀសដោយទាហាន និងផ្ទះសម្បែងគ្របដណ្ដប់ដោយល្បប់ភក់ និងក្រុមសង្គ្រោះដើរកាត់ទឹកកម្ពស់ត្រឹមចង្កេះ នៅតាមដងផ្លូវនានាក្នុងទីក្រុង៕