ទីក្រុងប៉េកាំងបានប្រាប់សហរដ្ឋអាមេរិកថា ខ្លួននឹងសងសឹក ប្រសិនបើលោក Donald Trump មិនព្រមទម្លាក់ចោលការគំរាមកំហែងរបស់លោកក្នុងការដាក់ពន្ធ ១០០% លើការនាំចូលរបស់ចិន ខណៈក្រុមអ្នកវិនិយោគត្រៀមទប់ទល់ជម្លោះសង្រ្គាមពាណិជ្ជកម្មដ៏ចលាចលមួយផ្សេងទៀត។

ក្រសួងពាណិជ្ជកម្មរបស់ប្រទេសចិនបានស្តីបន្ទោសទីក្រុងវ៉ាស៊ីនតោនចំពោះការបង្កើនភាពតានតឹងពាណិជ្ជកម្មរវាងប្រទេសទាំងពីរ បន្ទាប់ពីលោក Trump បានប្រកាសកាលពីថ្ងៃសុក្រថាលោកនឹងដាក់ពន្ធបន្ថែមលើការនាំចេញរបស់ចិនទៅកាន់សហរដ្ឋអាមេរិក រួមជាមួយនឹងការគ្រប់គ្រងថ្មីលើផ្នែក software សំខាន់ៗនៅថ្ងៃទី ១ ខែវិច្ឆិកា។ 

យោងតាមទីភ្នាក់ងារសារព័ត៌មានរដ្ឋចិន Xinhua អ្នកនាំពាក្យក្រសួងពាណិជ្ជកម្មចិនបាននិយាយកាលពីថ្ងៃអាទិត្យថា ការគំរាមកំហែងដោយចេតនានៃការយកពន្ធខ្ពស់មិនមែនជាវិធីត្រឹមត្រូវក្នុងការចុះសម្រុងជាមួយប្រទេសចិនទេ។ជំហររបស់ចិនចំពោះសង្គ្រាមពាណិជ្ជកម្មគឺស្របតាមជានិច្ច។ យើងមិនចង់បានទេ ប៉ុន្តែយើងក៏មិនខ្លាចដែរ។    

ប្រសិនបើសហរដ្ឋអាមេរិកទទូចចង់ដើរផ្លូវខុស ចិនច្បាស់ជានឹងចាត់វិធានការម៉ឺងម៉ាត់ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន។   

លោក Trump និងក្រុមមន្ត្រីរដ្ឋបាលជាន់ខ្ពស់របស់សហរដ្ឋអាមេរិកបានបើកទ្វារឆ្ពោះទៅរកកិច្ចព្រមព្រៀងពាណិជ្ជកម្មចិនកាលពីថ្ងៃអាទិត្យ ខណៈទីផ្សារភាគហ៊ុន បានបង្ហាញពីការធ្លាក់ចុះផ្សារភាគហ៊ុនអាមេរិកមួយផ្សេងទៀត៕