បេឡារុស្ស៖ ក្រុមមន្ត្រីបាននិយាយថា កងទ័ពរុស្ស៊ី និងបេឡារុសបានធ្វើសមយុទ្ធហ្វឹកហ្វឺនប្រយុទ្ធរួមគ្នានៅទីតាំងបាញ់ក្នុងតំបន់ Brestsky ប្រទេសបេឡារុស្ស ខណៈដែលការព្រួយបារម្ភនៅតែបន្តកើតមាន ជុំវិញការបង្កើនកងទ័ពរុស្ស៊ីនៅជិតព្រំដែនប្រទេសអ៊ុយក្រែន។
ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍ថា សមយុទ្ធនេះពាក់ព័ន្ធនឹងកងកាំភ្លើងធំ និងកងរថក្រោះ រួមទាំងឧទ្ធម្ភាគចក្រប្រយុទ្ធ និងកងទ័ពអាកាស។ ដោយបន្ថែមទៅលើទាហានប្រមាណ ១០ម៉ឺននាក់ដែលដាក់ពង្រាយនៅជិតប្រទេសអ៊ុយក្រែន ប្រទេសរុស្ស៊ីបានផ្លាស់ប្តូរកងកម្លាំងពីតំបន់ស៊ីបេរី និងចុងបូព៌ាសម្រាប់សមយុទ្ធជាមួយសម្ព័ន្ធមិត្តរបស់ខ្លួនគឺប្រទេសបេឡារុស ដែលមានព្រំប្រទល់ជាប់ប្រទេសអ៊ុយក្រែន។ ប្រធានអង្គការណាតូ លោក Jens Stoltenberg បាននិយាយទៅកាន់អ្នកសារព័ត៌មានថា ទីក្រុងមូស្គូ ពេលនេះបានដាក់ពង្រាយកងទ័ព និងឧបករណ៍បន្ថែមទៀតទៅកាន់ប្រទេសបេឡារុស្ស ច្រើនជាងពេលណាទាំងអស់ក្នុងរយៈពេល ៣០ឆ្នាំចុងក្រោយនេះ។ ការដាក់ពង្រាយនេះពង្រឹងបន្ថែមទៀត នូវវត្តមានយោធារុស្ស៊ីនៅជិតប្រទេសអ៊ុយក្រែន ក្នុងពេលមានការព្រួយបារម្ភរបស់ប្រទេសលោកខាងលិច ចំពោះការឈ្លានពានដែលបានគ្រោងទុក។ ប៉ុន្តែទីក្រុងម៉ូស្គូបានបដិសេធថា ខ្លួនគ្មានចេតនាវាយប្រហារប្រទេសជិតខាងរបស់ខ្លួនឡើយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
