លោកប្រធានាធិបតី Donald Trump បាននិយាយកាលពីថ្ងៃអាទិត្យ១២ តុលា ថា សហរដ្ឋអាមេរិកចង់ជួយប្រទេសចិន មិនមែនធ្វើឱ្យប៉ះពាល់ដល់ប្រទេសនេះនោះទេ មួយថ្ងៃបន្ទាប់ពីការគំរាមដំឡើងពន្ធបន្ថែម១០០ ភាគរយលើប្រទេសមានសេដ្ឋកិច្ចធំបំផុតទីពីររបស់ពិភពលោកមួយនេះ។

សេចក្តីថ្លែងការណ៍របស់លោក Trump កាលពីថ្ងៃសុក្រសប្ដាហ៍មុន ព្រមទាំងការគំរាមរបស់លោកក្នុងការលុបចោលកិច្ចប្រជុំជាមួយលោក Xi នៅចុងខែនេះ បានធ្វើឱ្យភាគហ៊ុនរបស់ Wall Street ធ្លាក់ចុះក្នុងចំណាក់កាលអវិជ្ជមាន ខណៈពាណិជ្ជករព្រួយបារម្ភថា សង្រ្គាមពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង អាចនឹងបន្តឡើងវិញ។      

លោក Trump បាននិយាយក្នុងការបង្ហោះកាលពីថ្ងៃអាទិត្យនៅលើបណ្ដាញសង្គម Truth Social ថា អាមេរិកចង់ជួយចិន មិនមែនធ្វើបាបចិនទេ ដោយបន្ថែមថា បញ្ហាសេដ្ឋកិច្ចរបស់ចិននឹងល្អប្រសើរទាំងអស់។

លោក Trump កាលពីថ្ងៃសុក្របាននិយាយថាលោកនឹងដំឡើងពន្ធបន្ថែមចាប់ពីថ្ងៃទី ១ ខែវិច្ឆិកាជាការឆ្លើយតបទៅនឹងអ្វីដែលលោកហៅថា ការទប់ស្កាត់ការនាំចេញរបស់ចិនថ្មីដ៏តឹងរ៉ឹងលើឧស្សាហកម្មរ៉ែកម្រ។

ទីក្រុងប៉េកាំង បានចោទប្រកាន់ទីក្រុងវ៉ាស៊ីនតោនពីទង្វើអយុត្តិធម៌ ដោយក្រសួងពាណិជ្ជកម្មរបស់ខ្លួនកាលពីថ្ងៃអាទិត្យបានហៅការគំរាមកំហែងពន្ធរបស់លោក Trump ថាជា គំរូធម្មតានៃស្តង់ដារពីរ ៕