អ៊ីស្រាអែល កាលពីថ្ងៃអាទិត្យ ទី១២ ខែតុលា បានប្រកាសជ័យជម្នះ នៅក្នុងសង្គ្រាមរបស់ខ្លួនជាមួយក្រុមហាម៉ាស ខណៈក្រុមសកម្មប្រយុទ្ធបានត្រៀមដោះលែងចំណាប់ថ្នូរដែលនៅរស់ ជាចំណាត់ការរដ៏សំខាន់នៅក្នុងផែនការតំបន់ហ្កាហ្សារបស់លោក Donald Trump ប៉ុន្មានម៉ោងមុនពេលលោកធ្វើជាម្ចាស់ផ្ទះកិច្ចប្រជុំកំពូលសន្តិភាពនៅក្នុងប្រទេសអេហ្ស៊ីប។

នៅក្រោមផែនទីបង្ហាញផ្លូវដែលបានស្នើឡើងរបស់ប្រធានាធិបតីសហរដ្ឋអាមេរិក នៅពេលក្រុមសកម្មប្រយុទ្ធប៉ាឡេស្ទីនប្រគល់ចំណាប់ថ្នូរ អ៊ីស្រាអែលនឹងចាប់ផ្តើមដោះលែងអ្នកជាប់ឃុំប្រហែល២.០០០នាក់ជាថ្នូរ។ ប៉ុន្តែក្រុមអ្នកចរចានៅតែមិនចុះសម្រុងគ្នាកាលពីល្ងាចថ្ងៃអាទិត្យ ជុំវិញការរៀបចំចុងក្រោយដោយមានប្រភពចំនួនពីររបស់ហាម៉ាសប្រាប់សារព័ត៌មានថា ក្រុមនេះកំពុងទទូចថាអ៊ីស្រាអែលត្រូវរួមបញ្ចូលមេដឹកនាំជាន់ខ្ពស់ប៉ាឡេស្ទីនប្រាំពីររូបនៅក្នុងបញ្ជីអ្នកដែលនឹងត្រូវដោះលែង។

ទោះជាយ៉ាងណា នាយករដ្ឋមន្ត្រី លោក Benjamin Netanyahu នៅតែជឿជាក់។ លោក Netanyahu បាននិយាយថា «នេះជាពេលវេលាដ៏រំជួលចិត្ត ពេលវេលានៃការសម្រក់ទឹកភ្នែក ពេលវេលានៃភាពរីករាយ ព្រោះថ្ងៃស្អែក ចំណាប់ថ្នូរនឹងត្រឡប់មកព្រំដែនរបស់យើងវិញ»។ លោកបាននិយាយថា «រួមគ្នា យើងសម្រេចបាននូវជ័យជម្នះដ៏អស្ចារ្យ ជ័យជម្នះដែលធ្វើឱ្យពិភពលោកទាំងមូលភ្ញាក់ផ្អើល ប៉ុន្តែក្នុងពេលជាមួយគ្នានេះ ខ្ញុំប្រាប់អ្នកថា ការប្រយុទ្ធនៅមិនទាន់ចប់ទេ»។ លោក Shosh Bedrosian អ្នកនាំពាក្យការិយាល័យរបស់លោក Netanyahu បាននិយាយថា ការដោះលែងចំណាប់ថ្នូរនឹងចាប់ផ្តើមនៅព្រឹកថ្ងៃចន្ទនេះ ដោយអ៊ីស្រាអែល «រំពឹងថាចំណាប់ថ្នូរដែលនៅរស់របស់យើងទាំង២០នាក់នឹងត្រូវបានដោះលែងក្នុងពេលតែមួយ»។ លោក Trump ធ្វើដំណើរទៅប្រទេសអ៊ីស្រាអែលភ្លាមៗបន្ទាប់ពីការដោះលែងដែលត្រូវរំពឹងទុក ហើយនឹងថ្លែងទៅកាន់សភាអ៊ីស្រាអែល មុនពេលធ្វើដំណើរទៅកាន់ប្រទេសអេហ្ស៊ីបធ្វើជាម្ចាស់ផ្ទះកិច្ចប្រជុំមេដឹកនាំពិភពលោកដើម្បីគាំទ្រផែនការរបស់លោកក្នុងការបញ្ចប់សង្រ្គាមនៅតំបន់ហ្កាហ្សា ដែលមានរយៈពេលពីរឆ្នាំ និងជំរុញសន្តិភាពនៅតំបន់មជ្ឈិមបូព៌ា។