អ៊ីស្រាអែល នឹងចាប់ផ្តើមដោះលែងអ្នកទោសប៉ាឡេស្ទីន នៅពេលដែលមានការបញ្ជាក់ថា ចំណាប់ថ្នូរទាំងអស់ដែលត្រូវបានឃុំខ្លួននៅតំបន់ហ្កាហ្សា បានទៅដល់ប្រទេសហើយ។ នេះបើយោងតាមស្ត្រីអ្នកនាំពាក្យរបស់នាយករដ្ឋមន្ត្រី ដែលបាននិយាយកាលពីថ្ងៃអាទិត្យ (ទី១២ ខែតុលា)។

លោកស្រី Shosh Bedrosian បានប្រាប់អ្នកសារព័ត៌មានថា៖ «អ្នកទោសប៉ាឡេស្ទីន នឹងត្រូវបានដោះលែង នៅពេលដែលអ៊ីស្រាអែល មានការបញ្ជាក់ថា ចំណាប់ថ្នូរទាំងអស់របស់យើង ដែលនឹងត្រូវដោះលែងនៅថ្ងៃស្អែក (ថ្ងៃចន្ទ) គឺបានឆ្លងកាត់ព្រំដែនចូលទៅក្នុងប្រទេសអ៊ីស្រាអែលហើយ»។

ក្នុងអំឡុងពេលមានបទឈប់បាញ់មុនៗ អដ្ឋិធាតុរបស់ចំណាប់ថ្នូរមួយចំនួន ត្រូវបានកំណត់អត្តសញ្ញាណដោយអ្នកជំនាញកោសល្យវិច័យ បន្ទាប់ពីបានប្រគល់ត្រលប់ទៅអ៊ីស្រាអែលវិញ។

លោកស្រី Bedrosian បានបញ្ជាក់ថា ពេលរង់ចាំការកំណត់អត្តសញ្ញាណ អ្នកទោសប៉ាឡេស្ទីន នឹងនៅលើរថយន្តក្រុងត្រៀមចេញដំណើរ។ លោកស្រីបានប្រាប់ថា៖ «ភ្លាមៗនៅពេលយើងមានការបញ្ជាក់ថា ពួកគេ (ចំណាប់ថ្នូរ) បានចូលទៅក្នុងដែនដីអ៊ីស្រាអែលហើយ រថយន្តក្រុងទាំងនោះនឹងវិលកង់ ហើយចាប់ផ្តើមការធ្វើដំណើររបស់អ្នកទោសទាំងនោះ»។

លោកស្រីបានបន្ថែមថា ការដោះលែងចំណាប់ថ្នូរទាំងអស់ដែលត្រូវបានឃុំខ្លួនរយៈពេលជាង ២ឆ្នាំ នៅតំបន់ហ្កាហ្សាស្ទ្រីប ត្រូវបានរំពឹងថា នឹងចាប់ផ្តើមនៅព្រឹកថ្ងៃចន្ទនេះ។

គួរបញ្ជាក់ថា អ៊ីស្រាអែល និងក្រុមហាម៉ាសបានអនុម័តដំណាក់កាលទី១ នៃផែនការដែលស្នើឡើងដោយប្រធានាធិបតីអាមេរិក លោក Donald Trump ក្នុងគោលបំណងបញ្ចប់សង្រ្គាម នៅតំបន់ហ្កាហ្សា ដែលបង្កឡើងដោយការវាយប្រហាររបស់ក្រុមហាម៉ាសលើអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣៕