អត្ថបទបែបអត្ថាធិប្បាយរបស់សារព័ត៌មានរ៉យទ័រ ដែលចេញផ្សាយនៅថ្ងៃចន្ទ (១៣ តុលា) នេះ បាននិយាយថា ឧប្បត្តិហេតុ "សង្រ្គាមកូនកាត់" ដែលសង្ស័យថាជារបស់រុស្ស៊ី កាន់តែច្រើនឡើងនៅទូទាំងអឺរ៉ុប នាពេលថ្មីៗ បានធ្វើឱ្យរដ្ឋាភិបាលទ្វីបនេះមានការប្រុងប្រយ័ត្នខ្ពស់ ហើយក៏បង្កើនសំណួរពីភាពងាយរងគ្រោះនៃហេដ្ឋារចនាសម្ព័ន្ធអគ្គិសនីក្នុងតំបន់ ស្របពេលរដូវរងាដ៏សំខាន់កំពុងចូលមកដល់។

ការទប់ស្កាត់ការបំផ្លិចបំផ្លាញបណ្តាញថាមពល បានក្លាយជាបញ្ហាប្រឈមផ្នែកសន្តិសុខ និងផ្នែកដឹកជញ្ជូនដល់ប្លុកអឺរ៉ុប ប៉ុន្តែមេដឹកនាំទ្វីបនេះប្រហែលជាត្រូវចាប់ផ្តើមរៀបចំផែនការ ដើម្បីកុំឱ្យពលរដ្ឋរបស់ខ្លួនត្រូវហែលឆ្លងរដូវរងារនេះក្នុងអាកាសធាតុត្រជាក់ដ៏ឃោរឃៅ។

នៅពេលសីតុណ្ហភាពត្រៀមធ្លាក់ចុះបន្តិចម្ដងៗ តំបន់នេះកំពុងមើលឃើញអ្វីដែលគេហៅថា សង្គ្រាមកូនកាត់ កាន់តែច្រើនឡើង ដែលអ្នកជំនាញជឿថាបង្កដោយរុស្ស៊ី ប៉ុន្តែទីក្រុងមូស្គូ តែងបដិសេធម្ដងហើយម្ដងទៀត។ សកម្មភាពទាំងនេះមានដូចជា ការបំពានដែនអាកាស និងការគំរាមកំហែងបែបប្រយោលដោយមិនបង្កឱ្យមានការឆ្លើយតបខាងយោធាពីណាតូ។

រលកចុងក្រោយនៃការវាយប្រហារកូនកាត់ទាំងនេះ មិនពាក់ព័ន្ធដោយផ្ទាល់ទៅនឹងហេដ្ឋារចនាសម្ព័ន្ធថាមពលរបស់អឺរ៉ុបទេ។ ទោះយ៉ាងនេះក៏ដោយ ការវាយលុយដែលរុស្ស៊ី និងអ៊ុយក្រែន កំពុងធ្វើដាក់គ្នាទៅមកលើរោងចក្រថាមពល បានបង្កើនក្ដីបារម្ភថា ហេដ្ឋារចនាសម្ព័ន្ធអគ្គិសនីអឺរ៉ុប នឹងក្លាយជាគោលដៅក្នុងសកម្មភាពបែបនេះនាពេលខាងមុខ៕