បណ្ដាប្រធានហិរញ្ញវត្ថុមកពីទូទាំងពិភពលោក នឹងបើកកិច្ចប្រជុំប្រចាំឆ្នាំនៅទីក្រុងវ៉ាស៊ីនតោន ចាប់ពីថ្ងៃចន្ទ ទី១៣ ខែតុលា ដល់ថ្ងៃសៅរ៍ ទី១៨ ខែតុលា ក្នុងសប្តាហ៍នេះ ដោយត្រៀមខ្លួនជាស្រេចដើម្បីពិភាក្សាពីភាពធន់របស់សេដ្ឋកិច្ចពិភពលោក ក្នុងការប្រឈមមុខនឹងរបាំងដំឡើងពន្ធរបស់លោកប្រធានាធិបតី Donald Trump ស្របពេលដែលភាពតានតឹងពាណិជ្ជកម្មរវាងអាមេរិក និងចិន បានផ្ទុះឡើងជាថ្មីម្ដងទៀត នៅពេលលោក Trump គំរាមយកពន្ធ ១០០% លើការនាំចូលរបស់ចិន។

កិច្ចប្រជុំប្រចាំឆ្នាំរបស់មូលនិធិរូបិយវត្ថុអន្តរជាតិ IMF និងធនាគារពិភពលោក ឥឡូវនេះ ច្បាស់ណាស់ថានឹងគ្របដណ្តប់ដោយសំណួរមួយប៉ុណ្ណោះនោះគឺ តើការប្តេជ្ញារបស់លោក Trump ក្នុងការសងសឹកចិន ជុំវិញការរឹតបន្តឹងការនាំចេញរ៉ែកម្រ នឹងអូសទាញសេដ្ឋកិច្ចធំជាងគេទាំងពីររបស់ពិភពលោកឱ្យត្រឡប់ទៅក្នុងសង្គ្រាមពាណិជ្ជកម្មពេញលេញ ឬក៏យ៉ាងណា។

កិច្ចប្រជុំ IMF និងធនាគារពិភពលោក នឹងនាំមនុស្សជាង ១០.០០០នាក់ ទៅកាន់ទីក្រុងវ៉ាស៊ីនតោន រួមទាំងរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាល មកពីជាង ១៩០ប្រទេស។ លោក Martin Muehleisen អតីតប្រធានយុទ្ធសាស្ត្រ IMF បាននិយាយថា ការគំរាមដាក់ពន្ធ ១០០% របស់លោក Trump អាចនឹងចរចាបាន ប៉ុន្តែភាពតានតឹងបច្ចុប្បន្ននឹងជះស្រមោលអាប់អួរបំផុតក្នុងកិច្ចប្រជុំហិរញ្ញវត្ថុសប្តាហ៍នេះ។

កិច្ចព្រមព្រៀងពាណិជ្ជកម្មបណ្ដោះអាសន្នរវាងអាមេរិក-ចិន ក្នុងពេល ៥ខែកន្លងមក បានបន្ទាបពន្ធរវាងមហាអំណាចសេដ្ឋកិច្ចទាំងពីរចុះពីកម្រិត ៣ខ្ទង់ពីមុន ហើយធ្វើឱ្យសេដ្ឋកិច្ចពិភពលោកបានធូរចិត្ត។ ប៉ុន្តែសុទិដ្ឋិនិយមបន្តិចនេះត្រូវខ្ទេចខ្ទីអស់កាលពីថ្ងៃសុក្រសប្ដាហ៍មុន ពេលដែលលោក Trump គំរាមដាក់ "ពន្ធដ៏ច្រើន" លើទំនិញចិន ហើយទីក្រុងប៉េកាំង ក៏ព្រមានចាត់វិធានការតបតវិញ៕