នាថ្ងៃចន្ទ (ទី១៣ ខែតុលា) នេះ នៅឯកិច្ចប្រជុំកំពូលស្ត្រីសកល ក្នុងទីក្រុងប៉េកាំង ប្រធានាធិបតីចិន លោក Xi Jinping បានអំពាវនាវឲ្យមានតំណាងស្ត្រីកាន់តែច្រើនឡើងៗ ទាំងនៅក្នុងវិស័យនយោបាយ និងរដ្ឋាភិបាល ជាចំណាត់ការមួយដែលលោកបាននិយាយថា នឹងធានាបានថា សមភាពយេនឌ័រ «ត្រូវបានធ្វើឲ្យក្លាយជាចំណែកយ៉ាងពិតប្រាកដ» របស់សង្គម។

អាជ្ញាធរបានឲ្យដឹងថា «កិច្ចប្រជុំមេដឹកនាំពិភពលោក ស្តីពីស្ត្រី» រយៈពេល ២ថ្ងៃដែលត្រូវបានរៀបចំឡើងរួមជាមួយអង្គការ UN Women ប្រឹងប្រែងជំរុញបន្ថែមទៀតដល់ការអភិវឌ្ឍរបស់ស្ត្រីនៅទូទាំងពិភពលោក សមភាពយេនឌ័រ និងការអភិវឌ្ឍយ៉ាងទូលំទូលាយរបស់ស្ត្រី។

ប្រព័ន្ធផ្សព្វផ្សាយរដ្ឋបានរាយការណ៍ថា មេដឹកនាំមកពីប្រទេសអ៊ីស្លង់ ស្រីលង្កា ហ្គាណា ដូមីនីក និងម៉ូសំប៊ិក កំពុងចូលរួមក្នុងព្រឹត្តិការណ៍នេះ។

ក្នុងឱកាសនោះ លោក Xi បានមានប្រសាសន៍ថា បណ្តាប្រទេសនានា ចាំបាច់ត្រូវ «ពង្រីកបន្ថែមបណ្តាញ ដើម្បីឲ្យស្ត្រីចូលរួម ក្នុងការធ្វើនយោបាយ និងការសម្រេចចិត្តនានា ហើយនិងលើកកម្ពស់ការចូលរួមយ៉ាងទូលំទូលាយរបស់ស្ត្រី ក្នុងអភិបាលរកិច្ចជាតិ និងសង្គម»។ មេដឹកនាំចិនបានសង្កត់ធ្ងន់ថា សន្តិភាព និងស្ថិរភាព គឺជាតម្រូវការជាមុន សម្រាប់ការអភិវឌ្ឍគ្រប់វិស័យរបស់ស្ត្រី។

គួរបញ្ជាក់ថា កិច្ចប្រជុំកំពូលនេះ កើតមានឡើងនៅពេលដែលប្រទេសចិន បានបោះជំហានយ៉ាងធំ ក្នុងការអប់រំស្ត្រី ដែលមានប្រហែល ៥០ភាគរយនៃសិស្ស នៅឧត្តមសិក្សា និងប្រហែល ៤៣ភាគរយនៃចំនួនប្រជាជនដែលមានការងារធ្វើសរុប៕