កំណើននៃការនាំចេញរបស់ប្រទេសចិន បានកើនឡើងយ៉ាងលឿនក្នុងខែកញ្ញា ដោយត្រូវបានជំរុញដោយក្រុមហ៊ុនផលិតដែលកំពុងស្វែងរកអ្នកទិញ នៅក្នុងទីផ្សារ ក្រៅពីសហរដ្ឋអាមេរិក ខណៈដែលកិច្ចព្រមព្រៀងពន្ធគយជាមួយប្រធានាធិបតីអាមេរិក លោក Donald Trump នៅតែមានភាពមិនច្បាស់លាស់ ខណៈពេលដែលវិនិយោគិន កំពុងដោះស្រាយជាមួយនឹងជុំចុងក្រោយបង្អស់នៃសង្គ្រាមពាណិជ្ជកម្មរបស់ប្រទេសទាំង២។

ទិន្នន័យគយ បានបង្ហាញនៅថ្ងៃចន្ទ (ទី១៣ ខែតុលា) នេះថា ការនាំចេញពីប្រទេសដែលមានសេដ្ឋកិច្ចធំបំផុតទី២ របស់ពិភពលោកមួយនេះ បានកើនឡើងប្រចាំឆ្នាំ ៨,៣ភាគរយ កាលពីខែមុន ដោយបានលើសកម្រិតស្ទង់មតិ ៦ភាគរយរបស់សារព័ត៌មាន Reuters និងបានបង្កើតកំណើនលឿនបំផុតជាលើកដំបូង ចាប់តាំងពីខែមីនា។ កម្រិតនោះត្រូវបានប្រៀបធៀបជាមួយនឹងកំណើនត្រឹមតែ ៤,៤ភាគរយ កាលពីខែសីហា។

ជាមួយគ្នានេះ ការនាំចូល បានកើនឡើង ៧,៤ភាគរយ ដែលជាល្បឿនលឿនបំផុត គិតចាប់តាំងពីខែមេសា ឆ្នាំ២០២៤ មក បើប្រៀបធៀបនឹងកម្រិតលើស ១,៣ភាគរយ កាលពីមួយខែមុន និងខ្ពស់ជាង ១,៥ភាគរយដែលជាការព្យាកររបស់អ្នកវិភាគ។

សេដ្ឋវិទូជាន់ខ្ពស់នៅក្រុមហ៊ុន Economist Intelligence Unit ក្នុងទីក្រុងប៉េកាំង លោក Xu Tianchen បាននិយាយថា៖ «ក្រុមហ៊ុនចិនកំពុងប្រឹងប្រែងលក់ផលិតផលយ៉ាងសកម្មនៅក្នុងទីផ្សារថ្មី ដោយសារអត្ថប្រយោជន៍នៃការចំណាយលើទំនិញរបស់ពួកគេ។ នោះប្រាកដណាស់»។

លោកបានបន្ថែមថា៖ «សហរដ្ឋអាមេរិក ឥឡូវនេះមានមិនដល់ ១០ភាគរយផងនៃការនាំចេញដោយផ្ទាល់របស់ប្រទេសចិន។ អត្រាពន្ធ ១០០ភាគរយ នឹងមិនមានអ្វីត្រូវសង្ស័យឡើយបន្ថែមសម្ពាធដល់វិស័យនាំចេញរបស់ប្រទេសចិន ប៉ុន្តែខ្ញុំមិនគិតថា ផលប៉ះពាល់នឹងមានទំហំធំដូចពីមុននោះទេ»។

គួរបញ្ជាក់ថា កាលពីថ្ងៃសុក្រសប្ដាហ៍កន្លងមក លោក Trump បានបង្ហាញពីការយកពន្ធបន្ថែម ១០០ភាគរយលើការនាំចេញទៅសហរដ្ឋអាមេរិករបស់ចិន ដោយធ្វើឲ្យសង្គ្រាមពាណិជ្ជកម្ម រវាងប្រទេសទាំង២ កាន់តែធ្ងន់ឡើង ដោយការប្រកាសនោះបានកកើតឡើងបន្ទាប់ពីទីក្រុងប៉េកាំងបានដាក់រ៉ែកម្រថ្មីមួយចំនួននៅក្រោមការគ្រប់គ្រងការនាំចេញ និងចេញការត្រួតពិនិត្យបន្ថែមលើអ្នកប្រើប្រាស់បន្ទះឈីប៕