បណ្ដាញសង្គមផ្សាយវីដេអូកម្រិតយក្ស គឺ YouTube បានព្រមាននៅថ្ងៃចន្ទ (ទី១៣ ខែតុលា) ថា ការជំរុញរបស់ប្រទេសអូស្ត្រាលី ក្នុងការហាមប្រាមកុមារមិនឲ្យប្រើប្រាស់បណ្ដាញសង្គម គឺមានចេតនាល្អ ប៉ុន្តែនឹងមិនធ្វើឲ្យពួកគេមានសុវត្ថិភាពនៅលើប្រព័ន្ធអ៊ីនធឺណិតជាងមុននោះឡើយ។

គួរដឹងថា លោកនាយករដ្ឋមន្ត្រី Anthony Albanese ក្នុងឆ្នាំ២០២៤ បានបង្ហាញនូវច្បាប់ដ៏លេចធ្លោ ដែលនឹងហាមឃាត់ក្មេងអាយុក្រោម ១៦ឆ្នាំ មិនឲ្យប្រើប្រាស់បណ្ដាញសង្គមនៅចុងឆ្នាំ២០២៥ នេះ។

កម្មវិធីពេញនិយមរបស់បណ្ដាញសង្គម ដូចជា Facebook, TikTok និង Instagram ជាដើម ប្រឈមនឹងការពិន័យយ៉ាងធ្ងន់ធ្ងរ ប្រសិនបើបំពាននឹងច្បាប់នវ។ ហើយ YouTube ដែលនឹងត្រូវស្ថិតក្រោមការហាមឃាត់ផងដែរនោះ បានផ្ដល់ហេតុផលថា ខ្លួនមិនមែនជាកម្មវិធីបណ្ដាញសង្គមនោះទេ ហើយគួរតែទទួលបានការលើកលែងមួយចំនួន។

ស្ត្រីអ្នកនាំពាក្យប្រចាំតំបន់របស់ក្រុមហ៊ុន គឺលោកស្រី Rachel Lord បានប្រាប់គណៈកម្មាធិការព្រឹទ្ធសភាថា ការហាមប្រាមនេះ គឺ «មានចេតនាល្អ» ប៉ុន្តែនឹងប្រឈមជាមួយការមាន «ផលវិបាកដោយអចេតនា»។ នៅថ្ងៃទី១៣ ខែតុលា លោកស្រី បានលើកឡើងថា៖ «ច្បាប់នឹងមិនត្រឹមតែពិបាកខ្លាំង ក្នុងការអនុវត្តប៉ុណ្ណោះទេ ប៉ុន្តែវាក៏ថែមទាំងមិនបំពេញតាមការសន្យា ក្នុងការធ្វើឲ្យកុមារកាន់តែមានសុវត្ថិភាពនៅលើប្រព័ន្ធអ៊ីនធឺណិតផងដែរ»។

លោកស្រី បានបញ្ជាក់បន្ថែមថា៖ «ច្បាប់ដែលបានបង្កើតយ៉ាងល្អនេះ អាចជាឧបករណ៍ដ៏មានប្រសិទ្ធភាពមួយ ដើម្បីកសាងកិច្ចខិតខំប្រឹងប្រែងក្នុងឧស្សាហកម្មនេះ ដើម្បីការពារកុមារ និងក្មេងជំទង់ឲ្យមានសុវត្ថិភាពជាងមុន នៅលើប្រព័ន្ធអ៊ីនធឺណិត ប៉ុន្តែដំណោះស្រាយ ក្នុងការការពារកុមារឲ្យមានសុវត្ថិភាពជាងមុននៅលើប្រព័ន្ធអ៊ីនធឺណិតនេះ គឺមិនបានបញ្ឈប់ពួកគេមិនឲ្យប្រើប្រាស់អ៊ីនធឺណិតនោះឡើយ»។

សូមបញ្ជាក់បន្ថែមថា អូស្ត្រាលី គឺជាប្រទេសនាំមុខគេក្នុងកិច្ចប្រឹងប្រែងសកល ក្នុងការទប់ស្កាត់ផលប៉ះពាល់ដោយសារប្រព័ន្ធអ៊ីនធឺណិត ប៉ុន្តែច្បាប់បច្ចុប្បន្ន ស្ទើរតែមិនមានព័ត៌មានលម្អិត អំពីរបៀបដែលការហាមឃាត់នេះ នឹងត្រូវអនុវត្ត។ ហើយអ្នកជំនាញខ្លះ បារម្ភថា ច្បាប់នេះគ្រាន់តែជានិមិត្តរូបប៉ុណ្ណោះ៕