ប្រធានាធិបតីអាមេរិក Donald Trump និងមេដឹកនាំអេហ្ស៊ីប លោក Abdel Fattah al-Sisi ត្រៀមធ្វើជាសហប្រធាននៃកិច្ចប្រជុំកំពូលសន្តិភាពហ្កាហ្សា នៅទីក្រុងរមណីយដ្ឋាន Sharm el-Sheikh នាថ្ងៃចន្ទ (ទិ១៣ ខែតុលា) ដោយមេដឹកនាំពិភពលោកជាង ២០រូប ត្រូវបានគេរំពឹងថា នឹងចូលរួមក្នុងព្រឹត្តិការណ៍ ក្នុងនោះរួមមានទាំងនាយករដ្ឋមន្រ្តីអ៊ីស្រាអែល លោក Benjamin Netanyahu ផងដែរ។

បើយោងតាមប្រធានាធិបតីអេហ្ស៊ីប បានឲ្យដឹងថា កិច្ចប្រជុំកំពូលនេះមានគោលបំណង «បញ្ចប់សង្គ្រាម នៅតំបន់ហ្កាហ្សាស្ទ្រីប បង្កើនកិច្ចខិតខំប្រឹងប្រែង ដើម្បីសម្រេចបានសន្តិភាព និងស្ថិរភាព នៅមជ្ឈិមបូព៌ា ហើយឈានទៅរកយុគសម័យថ្មីប្រកបដោយសន្តិសុខ និងស្ថិរភាព ក្នុងតំបន់»។

រដ្ឋមន្ត្រីការបរទេសអារ៉ាប៊ីសាអ៊ូឌីតព្រះអង្គម្ចាស់ Faisal bin Farhan ត្រូវបានរំពឹងថា នឹងចូលរួមកិច្ចប្រជុំនេះ។ ហើយប្រមុខអាជ្ញាធរប៉ាឡេស្ទីន លោក Mahmoud Abbas ក៏នឹងមានវត្តមានផងដែរ ដើម្បីបញ្ចប់ឲ្យបានសព្វគ្រប់នូវកិច្ចព្រមព្រៀងមួយ ដែលសំដៅបញ្ចប់សង្រ្គាម នៅតំបន់ហ្កាហ្សា។

តែយ៉ាងណាក្ដី សមាជិកការិយាល័យនយោបាយរបស់ក្រុមហាម៉ាស បានឲ្យដឹងថា ក្រុមនេះនឹងមិនចូលរួមក្នុងព្រឹត្តិការណ៍នេះទេ ដោយបញ្ជាក់បន្ថែមថា ក្រុមហាម៉ាស «បានធ្វើសកម្មភាពជាចម្បង តាមរយៈអ្នកសម្របសម្រួល គឺប្រេសកាតា និង អេហ្ស៊ីប» ក្នុងអំឡុងពេលមានកិច្ចពិភាក្សាមុនៗ ស្តីពីតំបន់ហ្កាហ្សា៕