ចំណាប់ថ្នូរនៅសល់ទាំងអស់ដែលមានជីវិត នៅតំបន់ហ្កាហ្សា ត្រូវបានដោះលែងពីការឃុំខ្លួនរបស់ក្រុមហាម៉ាស ហើយបានវិលត្រលប់ទៅប្រទេសអ៊ីស្រាអែលវិញ បន្ទាប់ពីមានសង្គ្រាមរយៈពេល ២ឆ្នាំ។ ក្រុមចំណាប់ថ្នូរ មានគ្នា ១៣នាក់ ទើបតែត្រូវបានអមដំណើរឆ្លងកាត់ព្រំដែន ដោយយោធាអ៊ីស្រាអែល ក្រោយក្រុមមានចំនួន ៧នាក់ ត្រូវបានដោះលែង នៅព្រឹកថ្ងៃចន្ទ (ទី១៣ ខែតុលា) នេះ។

គួរបញ្ជាក់ថា ជាផ្នែកនៃដំណាក់កាលទី១ នៃកិច្ចព្រមព្រៀងបទឈប់បាញ់សម្របសម្រួលដោយសហរដ្ឋអាមេរិក ការដោះលែងអ្នកទោសប៉ាឡេស្ទីន ២៥០នាក់ដែលអនុវត្តទោសជាប់ពន្ធនាគាររយៈពេលវែង និងមួយជីវិត ឥឡូវនេះ កំពុងដំណើរការ ក៏ដូចជាការដោះលែងអ្នកជាប់ឃុំប៉ាឡេស្ទីនជាង ១.៧០០នាក់ ពីតំបន់ហ្កាហ្សាដែលត្រូវបានអ៊ីស្រាអែលឃុំខ្លួនដោយមិនមានការចោទប្រកាន់ផ្លូវការ ចាប់តាំងពីមានការវាយប្រហារដឹកនាំដោយក្រុមហាម៉ាសកាលពីថ្ងៃទី៧ ខែតុលា ឆ្នាំ២០២៣។

រីឯប្រធានាធិបតីអាមេរិក លោក Donald Trump ឥឡូវនេះ បានទៅដល់សភាអ៊ីស្រាអែលហើយ ជាកន្លែងដែលលោកបានជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu។ លោក Trump នឹងថ្លែងទៅកាន់សមាជិកសភា Knesset ក៏ដូចជាជួបជាមួយក្រុមគ្រួសារនៃចំណាប់ថ្នូរមួយចំនួនផងដែរ។

បន្ទាប់មក លោក Trump នឹងធ្វើដំណើរទៅកាន់ប្រទេសអេហ្ស៊ីប ជាកន្លែងដែលមេដឹកនាំមកពីប្រទេសជាង ២០ នឹងចូលរួមកិច្ចប្រជុំកំពូល ស្តីពីអនាគតរបស់តំបន់ហ្កាហ្សា៕