ការិយាល័យរបស់លោក Benjamin Netanyahu បានឲ្យដឹងថា នាយករដ្ឋមន្ត្រីអ៊ីស្រាអែលរូបនេះ នឹងមិនចូលរួមកិច្ចប្រជុំកំពូល ក្នុងប្រទេសអេហ្ស៊ីប នាថ្ងៃចន្ទ (ទី១៣ ខែតុលា) នេះ ស្តីពីការបញ្ចប់សង្រ្គាម នៅតំបន់ហ្កាហ្សា បន្ទាប់ពីទីក្រុងគែរ បានប្រកាសថា លោកនឹងចូលរួម។

នៅក្នុងសេចក្តីថ្លែងការណ៍មួយ ការិយាល័យរបស់លោក Netanyahu បានឲ្យដឹងថា រូបលោកត្រូវបានអញ្ជើញដោយប្រធានាធិបតីអាមេរិក លោក Donald Trump ឲ្យចូលរួមក្នុងកិច្ចប្រជុំមេដឹកនាំពិភពលោកនៅទីក្រុងរមណីយដ្ឋាន Sharm el-Sheikh ប៉ុន្តែលោកបានបដិសេធ «ដោយសារតែជិតដល់ការចាប់ផ្តើមនៃថ្ងៃឈប់សម្រាករបស់ជនជាតិជ្វីហ្វ»។

សេចក្តីថ្លែងការណ៍នោះបានឲ្យដឹងថា៖ «លោកនាយករដ្ឋមន្ត្រីបានថ្លែងអំណរគុណដល់លោកប្រធានាធិបតី Trump សម្រាប់ការអញ្ជើញរូបលោក ក៏ដូចជាកិច្ចខិតខំប្រឹងប្រែងរបស់លោក ក្នុងការពង្រីករង្វង់សន្តិភាព ពោលគឺសន្តិភាពតាមរយៈភាពរឹងមាំ»។

អ្នកនាំពាក្យប្រធានាធិបតីអេហ្ស៊ីប បានប្រាប់នៅមុននេះថា ទាំងមេដឹកនាំប៉ាឡេស្ទីន Mahmoud Abbas និងលោក Netanyahu ត្រូវបានរំពឹងថា នឹងចូលរួមក្នុងកិច្ចប្រជុំកំពូល «ដើម្បីពង្រឹងដល់កិច្ចព្រមព្រៀង ដែលបញ្ចប់សង្គ្រាម នៅតំបន់ហ្កាហ្សា និងបញ្ជាក់ឡើងវិញនូវការប្តេជ្ញាចិត្តរបស់មេដឹកនាំទាំង២ ចំពោះកិច្ចព្រមព្រៀងនេះ»។

អ្នកនាំពាក្យរូបក៏បាននិយាយផងដែរថា លោក Trump និងលោក Netanyahu បានជជែកតាមទូរសព្ទជាមួយប្រធានាធិបតីអេហ្ស៊ីប លោក Abdel Fattah al-Sisi ខណៈពេលដែលពួកលោកស្ថិតនៅក្នុងប្រទេសអ៊ីស្រាអែល នាថ្ងៃទី១៣ ខែតុលានេះ៕