ប្រជាជនប៉ាឡេស្ទីនពេញទៅដោយក្ដីរំភើបរីករាយ បានរត់យ៉ាងប្រញាប់ប្រញាល់ទៅឱបអ្នកទោសដែលទទួលបានសេរីភាព ក្រោមកិច្ចព្រមព្រៀងបទឈប់បាញ់សម្របសម្រួលដោយសហរដ្ឋអាមេរិក ខណៈដែលពួកគេបានធ្វើដំណើរតាមរថយន្តក្រុងទៅដល់តំបន់កាន់កាប់ West Bank និងហ្កាហ្សា នៅថ្ងៃចន្ទ (ទី១៣ ខែតុលា) នេះ។

អ្នកទោសទាំងនោះត្រូវបានដោះលែង បន្ទាប់ពីក្រុមសកម្មប្រយុទ្ធហាម៉ាស បានប្រគល់ទៅវិញនូវចំណាប់ថ្នូរនៅរស់ចំនួន ២០នាក់ចុងក្រោយដែលត្រូវបានចាប់ខ្លួន ក្នុងអំឡុងពេលមានការវាយប្រហារថ្ងៃទី៧ ខែតុលា ឆ្នាំ២០២៣ ជាហេតុការណ៍ដែលបានបង្កឲ្យមានសង្រ្គាម នៅតំបន់ហ្កាហ្សា។

គួរបញ្ជាក់ថា ក្រោមកិច្ចព្រមព្រៀងនេះ អ៊ីស្រាអែលគ្រោងនឹងដោះលែងជនជាតិប៉ាឡេស្ទីន ២៥០នាក់ដែលត្រូវបានកាត់ទោសពីបទមនុស្សឃាត និងឧក្រិដ្ឋកម្មធ្ងន់ធ្ងរផ្សេងទៀត ព្រមទាំងជនជាតិប៉ាឡេស្ទីន ១.៧០០នាក់ដែលត្រូវបានឃុំខ្លួននៅតំបន់ហ្កាហ្សា ចាប់តាំងពីសង្គ្រាមបានចាប់ផ្តើម អនីតិជនប៉ាឡេស្ទីន ២២នាក់ និងសាកសពរបស់ក្រុមសកម្មប្រយុទ្ធ ៣៦០នាក់។

មនុស្សរាប់ពាន់នាក់បានប្រមូលផ្តុំគ្នា ទាំងនៅខាងក្នុង និងជុំវិញមន្ទីរពេទ្យ Nasser ក្នុងទីក្រុង Khan Younis នៅភាគខាងត្បូងនៃតំបន់ហ្កាហ្សាស្ទ្រីប ដោយរង់ចាំការទៅដល់នៃអ្នកទោសដែលត្រូវបានដោះលែង ដោយមានខ្លះគ្រវីទង់ជាតិប៉ាឡេស្ទីន និងខ្លះទៀតកាន់រូបភាពសាច់ញាតិរបស់ពួកគេ។

ដោយព្យាយាមទប់ទឹកភ្នែករបស់ខ្លួន ស្ត្រីម្នាក់ដែលសុំប្រាប់ត្រឹមឈ្មោះ Um Ahmed បាននិយាយថា ទោះបីជាលោកស្រីសប្បាយចិត្តនៅពេលមានការដោះលែងនេះក៏ដោយ ក៏លោកស្រីនៅតែមាន «អារម្មណ៍ច្របូកច្របល់» អំពីថ្ងៃនេះដែរ។

លោកស្រីបានប្រាប់សារព័ត៌មានរ៉យទ័រតាមរយៈសំឡេងថា៖ «ខ្ញុំសប្បាយចិត្តដែលកូនប្រុសរបស់យើងកំពុងត្រូវបានដោះលែង ប៉ុន្តែយើងនៅតែឈឺចាប់ សម្រាប់អ្នកទាំងអស់ដែលត្រូវបានសម្លាប់ដោយសកម្មភាពកាន់កាប់ និងការបំផ្លិចបំផ្លាញទាំងអស់ ដែលបានកើតឡើង ចំពោះតំបន់ហ្កាហ្សារបស់យើង»។

អ្នកទោសដែលត្រូវបានដោះលែង បានធ្វើដំណើរទៅដល់តាមរថយន្តក្រុង ដោយពួកគេខ្លះអើតតាមបង្អួចដោយបញ្ចេញសញ្ញាអក្ស V ដែលតំណាងឲ្យជ័យជម្នះ។ ពួកគេនឹងទទួលការពិនិត្យសុខភាព នៅមន្ទីរពេទ្យ៕