រដ្ឋាភិបាលម៉ិកស៊ិក បាននិយាយនៅថ្ងៃចន្ទ (១៣ តុលា) ថា ភ្លៀងធ្លាក់ដ៏ខ្លាំងក្លាបំផុតដែលវាយប្រហារប្រទេសនេះកាលពីសប្តាហ៍មុន បានសម្លាប់មនុស្សយ៉ាងហោចណាស់ ៦៤នាក់ និងប្រមាណ ៦៥នាក់ទៀត កំពុងបាត់ខ្លួន បន្ទាប់ពីសម្ពាធត្រូពិកបានបង្កឱ្យមានបំណាក់ដី និងទឹកជំនន់យ៉ាងគំហុកក្នុងផ្នែកខ្លះនៃតំបន់ឆ្នេរឈូងសមុទ្រ និងរដ្ឋភាគកណ្តាល ដែលប៉ះពាល់ដល់អ្នកស្រុករាប់ម៉ឺនគ្រួសារ។

ប្រព័ន្ធអាកាសធាតុ ដែលមិនត្រូវបានគេដាក់ឈ្មោះនេះ បានវាយប្រហារប្រទេសម៉ិកស៊ិកនៅចុងបញ្ចប់នៃរដូវវស្សា បង្កជាមហន្តរាយធម្មជាតិ និងធ្វើឱ្យកម្ពស់ទឹកឡើងលើសកម្រិត នៅក្នុងទន្លេដែលពេញប្រៀបរួចទៅហើយដោយសារភ្លៀងជាច្រើនខែ។ ប្រធានាធិបតីម៉ិកស៊ិក លោកស្រី Claudia Sheinbaum បាននិយាយថា "ភ្លៀងកាលពីសប្ដាហ៍មុននោះ មិនត្រូវបានរំពឹងថានឹងមានកម្រិតខ្លាំងក្លាបែបនេះទេ"។ លោកស្រីបន្ថែមថា ផ្ទះសម្បែងអ្នកស្រុកប្រហែល ១០ម៉ឺនខ្នង បានរងផលប៉ះពាល់។

អាជ្ញាធរបានដាក់ពង្រាយបុគ្គលិករាប់ពាន់នាក់ ដើម្បីជួយដល់ការជម្លៀស សម្អាត និងតាមដានកន្លែងរងគ្រោះធ្ងន់ធ្ងរបំផុត។ មន្រ្តីការពារស៊ីវិលបាននិយាយថា រដ្ឋ Hidalgo និង Veracruz គឺជាទីដែលរងផលប៉ះពាល់ខ្លាំងជាងគេ បន្ទាប់មកគឺរដ្ឋ Veracruz និង Hidalgo ។

ភ្លៀងក៏បានបំផ្លាញហេដ្ឋារចនាសម្ព័ន្ធដូចជាស្ពាន និងធ្វើឱ្យផ្លូវថ្នល់ពោរពេញដោយល្បប់ភក់។ វីដេអូ និងរូបភាពពីប្រព័ផ្សព្វផ្សាយបានបង្ហាញឱ្យឃើញ ក្រុមសង្គ្រោះបន្ទាន់ ដើរឆ្លងកាត់ទឹកយ៉ាងជ្រៅ ដើម្បីជួយអ្នកស្រុកដែលជាប់គាំង និងបញ្ជូនគ្រឿងផ្គត់ផ្គង់ដល់សហគមន៍ដែលរងផលប៉ះពាល់៕