សារព័ត៌មាន Fox News បានរាយការណ៍ថា ព្រឹទ្ធសភារបស់សហរដ្ឋអាមេរិក គ្រោងនឹងជួបប្រជុំគ្នាជាថ្មីនៅថ្ងៃអង្គារ (១៤ តុលា) នេះ ដើម្បីបោះឆ្នោតម្តងទៀតទៅលើថា តើត្រូវបើករដ្ឋាភិបាលឡើងវិញឬយ៉ាងណា ប៉ុន្តែផែនការនេះត្រូវបានរំពឹងថានឹងបរាជ័យដូចលើកមុនដែរ ដោយសារឧបសគ្គនៅតែមានលើការឯកភាព ក្នុងចំណោមសមាជិកគណបក្សសាធារណរដ្ឋ និងបក្សប្រជាធិបតេយ្យ ជុំវិញច្បាប់ចំណាយថ្មី។

ព្រឹទ្ធសមាជិកអាមេរិក នឹងបោះឆ្នោតជាលើកទី៨ ក្នុងថ្ងៃអង្គារនេះ លើសេចក្ដីស្នើច្បាប់ចំណាយថ្មីរបស់បក្សសាធារណរដ្ឋ ប៉ុន្តែជោគជ័យហាក់ដូចជានៅវែងឆ្ងាយណាស់ ដោយសារពុំមានភាគីណាមួយព្រមដកថយពីជំហរដ៏រឹងរូសរបស់ខ្លួនឡើយ ខណៈការបិទរដ្ឋាភិបាលអាមេរិក កាន់តែខិតជិតដល់សប្តាហ៍ទីបីទៅហើយ គិតចាប់ពីថ្ងៃទី១ ខែតុលា មក។

ព្រឹទ្ធសមាជិកមកពីបក្សសាធារណរដ្ឋ ចង់អនុម័តការពន្យារពេលផ្តល់មូលនិធិរយៈពេលខ្លីរបស់សភា ដែលនឹងបើករដ្ឋាភិបាលឡើងវិញរហូតដល់ថ្ងៃទី២១ ខែវិច្ឆិកា។ ប៉ុន្តែព្រឹទ្ធសមាជិកខាងបក្សប្រជាធិបតេយ្យ ដែលដឹកនាំលោក Chuck Schumer នៅតែប្រកាន់ជំហរថា ពួកគេនឹងមិនផ្តល់ឱ្យអ្នកសាធារណរដ្ឋនូវសំឡេងឆ្នោតដែលត្រូវការដើម្បីបើករដ្ឋាភិបាលឡើងវិញទេ លុះត្រាតែមានកិច្ចព្រមព្រៀងរឹងមាំមួយដើម្បីបន្តការឧបត្ថម្ភធនផ្នែកសុខភាព Obamacare ដែលបានផុតកំណត់។

ភាគីទាំងពីរកំពុងជជែកគ្នា ដោយបំបែកជាក្រុមតូចៗផ្តោតលើការទាមទារមួយចំនួនរបស់បក្សប្រជាធិបតេយ្យ ប៉ុន្តែទោះយ៉ាងនេះក្តី មិនទាន់មានការចរចាជាក់លាក់ណាមួយ ឬច្រកចេញពីភាពជាប់គាំងនេះឡើយ។ គួរឱ្យដឹងថា បក្សសាធារណរដ្ឋរបស់លោកប្រធានាធិបតី Donald Trump មានសំឡេងភាគច្រើនក្នុងសភាទាំងពីរ ប៉ុន្តែក៏ត្រូវការការគាំទ្រពីខាងបក្សប្រជាធិបតេយ្យនៅព្រឹទ្ធសភាផងដែរ ដើម្បីអនុម័តវិធានការផ្តល់មូលនិធិថ្មីដើម្បីបើកដំណើរការរដ្ឋាភិបាលឡើងវិញ៕