អគ្គលេខាធិការអង្គការណាតូ (NATO) លោក Mark Rutte កាលពីថ្ងៃចន្ទ (១៣ តុលា) បានព្រមានថា រុស្ស៊ី នៅតែមាន "គ្រោះថ្នាក់ខ្លាំងណាស់" បើទោះបីជាជួបការលំបាក និងជំហានថយក្រោយជាច្រើនក្នុងសមរភូមិក៏ដោយ ខណៈជំរុញឱ្យសម្ព័ន្ធយោធាបន្តពង្រឹងការរារាំង និងការត្រៀមលក្ខណៈស៊ីវិល ស្របពេលទីក្រុងមូស្គូ បង្កើននូវអ្វីដែលមន្រ្តីអឺរ៉ុបហៅថាជាការវាយប្រហារកូនកាត់យ៉ាងចម្រុះទូទាំងទ្វីប។

ថ្លែងប្រាប់កិច្ចប្រជុំប្រចាំឆ្នាំលើកទី៧១ របស់សភាណាតូ លោក Rutte បាននិយាយថា "គ្រប់គ្នាមិនគួរមើលស្រាលការគំរាមកំហែង និងសមត្ថភាពរបស់រុស្ស៊ីនោះទេ... ទោះជារុស្ស៊ីមិនខ្លាំងដូចមុនមែន ប៉ុន្តែនៅតែមានគ្រោះថ្នាក់ខ្លាំង ហើយនោះជាមូលហេតុចាំបាច់ណាស់ ដែលណាតូត្រូវតែត្រៀមខ្លួនឱ្យបានរួចរាល់"។ ប្រមុខសម្ព័ន្ធយោធាលោកខាងលិចមួយនេះ ក៏បានចោទទីក្រុងមូស្គូ ថាកំពុងធ្វើការវាយប្រហារតាមអ៊ីនធឺណិត ការបំផ្លិចបំផ្លាញ និងប្រតិបត្តិការចារកម្ម ប្រឆាំងនឹងប្រទេសសម្ព័ន្ធមិត្ត។

រុស្ស៊ី មិនទាន់អត្ថាធិប្បាយលើការលើកឡើងរបស់លោក Rutte នៅឡើយទេ ប៉ុន្តែក្រុមមន្ត្រីរុស្ស៊ីបានបដិសេធម្តងហើយម្តងទៀតចំពោះការចោទប្រកាន់ទាំងឡាយលើសកម្មភាពវាយប្រហារកូនកាត់លើអឺរ៉ុបបែបនេះ ដោយនិយាយថា ការបន្តពង្រីកខ្លួនទៅភាកខាងកើតរបស់ណាតូ និងការផ្គត់ផ្គង់សព្វាវុធឱ្យអ៊ុយក្រែនទៅវិញទេ ដែលបង្កការគំរាមកំហែងដោយផ្ទាល់ដល់សន្តិសុខរុស្ស៊ី៕