អង្គការសុខភាពពិភពលោក WHO កាលពីថ្ងៃចន្ទ (១៣ តុលា) បានចេញការព្រមានសុខភាពពីទឹកស៊ីរ៉ូក្អក ៣ប្រភេទ ដែលមានសារធាតុពុលនៅប្រទេសឥណ្ឌា ដោយជំរុញឱ្យអាជ្ញាធរទូទាំងពិភពលោក រាយការណ៍ទៅកាន់ទីភ្នាក់ងារសុខភាពមួយនេះ ប្រសិនរកឃើញថ្នាំទាំងអស់នោះក្នុងប្រទេសរបស់ពួកគេ បន្ទាប់ពីកុមារជាច្រើននាក់បានស្លាប់។

អង្គការ WHO បាននិយាយថា ស៊ីរ៉ូក្អកទាំងនោះមានដូចជា ស៊ីរ៉ូ Coldrif របស់ក្រុមហ៊ុន Sresan Pharmaceutical និងស៊ីរ៉ូ Respifresh TR មកពីស្ថាប័ន Rednex Pharmaceuticals និងប្រភេទចុងក្រោយឈ្មោះ ReLife ផលិតដោយក្រុមហ៊ុន Shape Pharma ។

WHO និយាយថា ផលិតផលទាំងនេះបង្កហានិភ័យយ៉ាងសំខាន់ ហើយអាចបណ្តាលឱ្យកើតជំងឺធ្ងន់ធ្ងរ ដែលអាចគំរាមកំហែងដល់អាយុជីវិត។ គួរឱ្យដឹងថា ស៊ីរ៉ូក្អក Coldrif មានផ្ទុកជាតិពុលឈ្មោះ ឌីយ៉ែតទីលែន គ្លីកូ (DEG) ដែលប្រើក្នុងសារធាតុរំលាយឧស្សាហកម្ម ក្នុងបរិមាណជិត ៥០០ដងលើសដែនកំណត់អនុញ្ញាត។

អាជ្ញាធរសុខាភិបាលឥណ្ឌា ដែលជាអង្គភាពត្រួតពិនិត្យស្តង់ដារឱសថកណ្តាល បានជូនដំណឹងដល់ WHO ថា ស៊ីរ៉ូនោះត្រូវរាយការណ៍ថាបានប្រើប្រាស់ដោយកុមារអាយុក្រោម ៥ឆ្នាំ ដែលបានស្លាប់ប្រហែលជា ២០នាក់ ភាគច្រើនមកពីរដ្ឋ Madhya Pradesh ហើយមិនបានចែកចាយក្រៅទៅប្រទេសឡើយ ប៉ុន្តែនៅតែត្រូវប្រុងប្រយ័ត្នចំពោះបណ្ដាញដែលមិនបានត្រួតពិនិត្យ។ រដ្ឋបាលចំណីអាហារ និងឱសថអាមេរិក FDA ក៏បានបញ្ជាក់កាលពីថ្ងៃសុក្រសប្ដាហ៍មុនថា ស៊ីរ៉ូក្អកពុលទាំងនេះ មិនត្រូវបានដឹកជញ្ជូនទៅសហរដ្ឋអាមេរិកទេ៕