ប្រធានាធិបតី លោក Andry Rajoelina បានភៀសខ្លួនចេញពីប្រទេសម៉ាដាហ្គាស្កា ដើម្បីការពារជីវិតរបស់លោក ក្នុងពេលមានការតវ៉ានៅទូទាំងប្រទេស ដែលបានចាប់ផ្តើមកាលពីចុងខែមុន។

លោក Rajoelina បានបញ្ជាក់នៅក្នុងសុន្ទរកថាលើបណ្តាញសង្គម Facebook កាលពីថ្ងៃចន្ទថា លោកបានធ្វើដំណើរទៅកាន់ទីមានសុវត្ថិភាពក្រោយពីមានរបាយការណ៍និងពាក្យចចាមអារ៉ាមថា លោកបានជិះយន្តហោះចេញពីប្រទេសកាលពីថ្ងៃអាទិត្យ។

បុរសវ័យ៥១ឆ្នាំរូបនេះ ពុំបានប្រាប់ពីទីកន្លែងស្នាក់នៅរបស់លោកនៅពេលនេះទេ។ ការិយាល័យរបស់លោក Rajoelina បាននិយាយនៅលើបណ្តាញសង្គម Facebook ថា លោក Rajoelina ត្រូវថ្លែងសុន្ទរកថាតាមទូរទស្សន៍កាលពីរសៀលថ្ងៃច័ន្ទ ប៉ុន្តែសុន្ទរកថាត្រូវបានពន្យារពេលបន្ទាប់ពី«កងកម្លាំងប្រដាប់អាវុធមួយក្រុមបានគំរាមគ្រប់គ្រងប្រព័ន្ធផ្សព្វផ្សាយរដ្ឋ»។ កាលពីថ្ងៃច័ន្ទ ប្រធានាធិបតីបារាំង លោក Emmanuel Macron បានសម្តែងការព្រួយបារម្ភជុំវិញស្ថានភាពនៅក្នុងអតីតអាណានិគមរបស់ប្រទេសរបស់លោក ដែលអង្គការសហប្រជាជាតិបាននិយាយថា មនុស្សយ៉ាងហោចណាស់២២នាក់ត្រូវបានសម្លាប់នៅក្នុងការប៉ះទង្គិចគ្នារវាងក្រុមបាតុករ និងកងកម្លាំងសន្តិសុខ។

ថ្លែងពីកិច្ចប្រជុំកំពូលក្នុងប្រទេសអេហ្ស៊ីប លោក Macron បានបដិសេធមិនធ្វើអត្ថាធិប្បាយថាតើ លោក Rajoelina ត្រូវបានជម្លៀសដោយប្រទេសបារាំងឬយ៉ាងណា។ លោកនិយាយថា «ខ្ញុំនឹងមិនបញ្ជាក់អំពីអ្វីទាំងអស់នៅថ្ងៃនេះ»។ «ខ្ញុំគ្រាន់តែចង់បង្ហាញពីការព្រួយបារម្ភខ្លាំងរបស់យើងតែប៉ុណ្ណោះ»។

ប្រភពយោធាបានប្រាប់ទីភ្នាក់ងារសារព័ត៌មានរ៉យទ័រថា លោក Rajoelina បានចាកចេញពីប្រទេសម៉ាដាហ្គាស្ការ កាលពីថ្ងៃអាទិត្យតាមយន្តហោះ Casa របស់កងទ័ពបារាំង បន្ទាប់ពីត្រូវបានគេនាំទៅកាន់អាកាសយានដ្ឋាន Sainte Marie ដោយឧទ្ធម្ភាគចក្រ។