ប្រធានក្រុមប្រឹក្សាអឺរ៉ុប លោក Antonio Costa បាននិយាយកាលពីថ្ងៃចន្ទ (ទី១៣ ខែតុលា)ថា កិច្ចប្រជុំកំពូលនៅទីក្រុង Sharm el-Sheikh ប្រទេសអេហ្ស៊ីបស្តីពីតំបន់ហ្កាហ្សាបានបង្ហាញពី «ថ្ងៃនៃក្តីសង្ឃឹមសម្រាប់សន្តិភាព» ខណៈសង្កត់ធ្ងន់ថាការទទួលបាននូវដំណោះស្រាយយូរអង្វែងនឹងតម្រូវឱ្យមានការប្តេជ្ញាចិត្តជាអន្តរជាតិនៅបន្ត។

លោក Costa និយាយថា មេដឹកនាំអឺរ៉ុប ដែលចូលរួមក្នុងកិច្ចប្រជុំកំពូលសន្តិភាពបានរួបរួមគ្នាក្នុងការគាំទ្ររបស់ខ្លួនចំពោះផែនការដែលមានបំណងបញ្ចប់សង្រ្គាមនៅតំបន់ហ្កាហ្សា និងត្រួសត្រាយផ្លូវឈានឆ្ពោះទៅរកដំណោះស្រាយរដ្ឋពីរ។

លោកបាននិយាយថា សហភាពអឺរ៉ុប កំពុងចូលរួមចំណែកលើផ្នែកជាច្រើន រួមទាំងការគ្រប់គ្រងព្រំដែន ការបណ្តុះបណ្តាលនគរបាល ការផ្តល់ជំនួយមនុស្សធម៌ និងជំនួយហិរញ្ញវត្ថុដល់អាជ្ញាធរប៉ាឡេស្ទីន ដើម្បីជួយធានាបានអភិបាលកិច្ចប្រកបដោយប្រសិទ្ធភាព និងការកសាងតំបន់ហ្កាហ្សាឡើងវិញ។

អ្នកសម្របសម្រួលអេហ្ស៊ីប កាតា និងទួរគី បានចុះហត្ថលេខាកាលពីថ្ងៃចន្ទជាមួយប្រធានាធិបតីសហរដ្ឋអាមេរិក លោក Donald Trump លើឯកសារស្តីពីកិច្ចព្រមព្រៀងបទឈប់បាញ់នៅតំបន់ហ្កាហ្សា។ ឯកសារនេះត្រូវបានចុះហត្ថលេខាក្នុងអំឡុងពេលកិច្ចប្រជុំកំពូលអន្តរជាតិដែលធ្វើជាម្ចាស់ផ្ទះដោយប្រទេសអេហ្ស៊ីបនៅទីក្រុងរមណីយដ្ឋានសមុទ្រក្រហម Sharm El-Sheikh ។