រដ្ឋមន្ត្រីការបរទេសម៉ាឡេស៊ី លោក Mohamad Hasan បាននិយាយនៅថ្ងៃអង្គារ (១៤ តុលា) នេះថា ប្រធានាធិបតីសហរដ្ឋអាមេរិក លោក Donald Trump នឹងធ្វើទស្សនកិច្ចទៅកាន់ប្រទេសម៉ាឡេស៊ី នៅថ្ងៃទី២៦ ខែតុលា ខាងមុខ ដើម្បីចូលរួមជំនួបកំពូលអាស៊ាន ហើយកំពុង "ទន្ទឹងរង់ចាំ" ធ្វើជាសាក្សីដោយផ្ទាល់នៃកិច្ចព្រមព្រៀងសន្តិភាពព្រំដែនរវាងថៃ និងកម្ពុជា។

លោក Mohamad បាននិយាយថា ម៉ាឡេស៊ី និងសហរដ្ឋអាមេរិក នឹងសម្របសម្រួលបទឈប់បាញ់នេះរវាងថៃ និងកម្ពុជា ដែលនឹងតម្រូវឱ្យភាគីទាំងពីរដកមីន និងយុទ្ធោបករណ៍ធុនធ្ងន់ទាំងអស់ចេញពីព្រំដែនរបស់ពួកគេ។

ប្រមុខការទូតម៉ាឡេស៊ីរូបនេះបន្តទៀតថា លោកសង្ឃឹមថា កិច្ចព្រមព្រៀងសន្តិភាពនោះនឹងត្រូវបានចុះហត្ថលេខាក្នុងអំឡុងកិច្ចប្រជុំនាពេលខាងមុខរបស់ថ្នាក់ដឹកនាំមកពីសមាគមប្រជាជាតិអាស៊ីអាគ្នេយ៍ (អាស៊ាន) ដែលគ្រោងប្រព្រឹត្តទៅនៅទីក្រុងគូឡាឡាំពួ ប្រទេសម៉ាឡេស៊ី ចាប់ពីថ្ងៃទី២៦ ដល់ថ្ងៃទី២៨ ខែតុលា នាពេលខាងមុខ។

លោក Mohamad បានប្រាប់ប្រព័ន្ធផ្សព្វផ្សាយថា "ក្នុងអំឡុងកិច្ចប្រជុំកំពូលនេះ ម៉ាឡេស៊ីសង្ឃឹមថានឹងមើលឃើញការចុះហត្ថលេខាលើសេចក្តីប្រកាសមួយ ដែលគេស្គាល់ថាជា កិច្ចព្រមព្រៀងគូឡាឡាំពួ រវាងប្រទេសជិតខាងទាំងពីរ ដើម្បីធានាបាននូវសន្តិភាព និងបទឈប់បាញ់ដ៏យូរអង្វែង"៕