នៅថ្ងៃទី១៤ ខែតុលា ឆ្នាំ២០២៥ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ និង​ជា​សមាជិក​គណៈកម្មាធិការ​លទ្ធកម្ម តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្តីក្រសួង​អភិវឌ្ឍន៍​ជនបទ បានអញ្ជើញដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និង​ក្រសួង​សេដ្ឋកិច្ច និងហិរញ្ញវត្ថុ អមដំណើរដោយ​ថ្នាក់​ដឹកនាំ​ក្រុម​ការងារ​បច្ចេក​ទេស​នាយកដ្ឋាន​ផ្លូវ​លំ​ជន​បទ​ គណៈកម្មការត្រួតពិនិត្យ និងវាយតម្លៃគុណភាពការងារសាងសង់ ស្តារឡើងវិញ ជួសជុល ថែ​ទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ) ថ្នាក់​ដឹក​នាំ​មន្ទីរ​អភិវឌ្ឍន៍​ជន​បទ​ខេត្ត​ពោធិ៍សាត់ និងអាជ្ញាធរមូលដ្ឋាន បានចុះត្រួតពិនិត្យបញ្ចប់១០០% លើការងារ​ថែ​ទាំ​ខួប​ផ្លូវ​ក្រាល​ល្បាយ​ក្រួលចំនួន ១ខ្សែ ប្រវែង ៨១០០ម ទទឹង សាងសង់លូមូលមុខមួយចំនួន ១កន្លែង លូ​មូលមុខពីរចំនួន៣កន្លែង ស្ថិតក្នុងឃុំព្រងិល ស្រុកភ្នំក្រវាញ និងឃុំត្នោតជុំ ស្រុកក្រគរ អនុវត្ត​គម្រោង​ដោយ មន្ទីរអភិវឌ្ឍន៍ជនបទខេត្តពោធិ៍សាត់ ដោយប្រើប្រាស់ថវិកា​របស់​រាជ​រដ្ឋាភិបាល​កម្ពុជា​តាម​រយៈក្រសួងអភិវឌ្ឍន៍ជនបទ ។

ក្នុងឱកាសនោះ ឯកឧត្តមបណ្ឌិត ចាន់ ដារ៉ុង មានប្រសាសន៍លើកឡើងថា ក្រសួង​អភិវឌ្ឍន៍​ជន​បទ​ដែល​មាន ឯកឧត្តម ឆាយ ឫទ្ធិសែន ជារដ្ឋមន្រ្តី បាននឹងកំពុងយកចិត្តលើគុណភាពផ្លូវជនបទ ទាំង​ការស្ថាបនាផ្លូវថ្មី និងការជួសជុល ថែទាំផ្លូវដែលមានស្រាប់ ដើម្បីការ​ប្រើ​ប្រាស់​បានយូរអង្វែង ធ្វើឲ្យចំណេញថវិការជាតិ ជាក់ស្តែង ក្នុងពេលនេះ គណៈកម្មការអន្តរក្រសួង និងមន្ត្រីបច្ចេកទេស បានចុះពិនិត្យ វាយតំលៃលើការងារថែទាំខួបផ្លូវក្រាលល្បាយក្រួលចំនួន ១ខ្សែក្នុងខេត្តពោធិ៍សាត់ ដែល​ផ្លូវ​ល្បាយក្រួសជាទូទៅ ពុំមានអាយុកាលប្រើប្រាស់បានយូរដូចផ្លូវកោះស៊ូរ និង​ផ្លូវ​បេតុង​នោះ​ ដូចនេះការថែទាំប្រកបដោយគុណភាពគឺជារឿងចាំបាច់ ។ ជាមួយគ្នានោះ ឯកឧត្តម​រដ្ឋ​លេខា​ធិការ បានជម្រាបជូនដល់អាជ្ញាធរ ភូមិ-ឃុំ ថា ទោះជាការងារថែទាំផ្លូវនេះ ជាគម្រោង​របស់​ក្រសួង​អភិវឌ្ឍន៍ជនបទ និងអនុវត្តន៍ដោយមន្ទីរអភិវឌ្ឍន៍ជនបទខេត្តក៏ពិតមែន តែសូម​អាជ្ញាធរ​ភូមិ-ឃុំ និងប្រជាពលរដ្ឋដែលជាអ្នកប្រើប្រាស់ផ្លូវនេះដោយផ្ទាល់ត្រូវ​ចូល​រួម​ចំណែក​ក្នុង​ការ​ថែ​រក្សា ដោយទប់ស្កាត់ការដឹកលើសទំងន់ កុំចាក់ដីខ្ពស់ជាងផ្លូវ កុំលុបផ្លូវទឹកសងខាងផ្លូវ កុំហាល​កសិផល​នា​នានៅលើផ្លូវ មានផ្លូវស្រួលកុំបើកបរលឿនពេកត្រូវគោរច្បាប់ចរាចរណ៍ និង​ត្រូវ​ចូល​រួម​ថែ​រក្សា​បរិស្ថានអនាម័យតាមដងផ្លូវ។

បន្ទាប់ពីបានចុះត្រួតពិនិត្យ និងប្រជុំពិភាក្សាជាមួយអ្នកទទួលការ និងអ្នកបច្ចេកទេសរួចមក គណៈ​កម្មការ​អន្តរ​ក្រសួង​បាន​ឯកភាព​ទទួល​យក​វឌ្ឍនភាព​ការងារ​១០០%​លើ​គម្រោង​ខាង​លើ​នេះ​។ ទន្ទឹមនេះ គណៈកម្មការអន្តរក្រសួងបានណែនាំដល់មន្ទីរអភិវឌ្ឍន៍ជនបទជាអ្នកទទួលការ ឱ្យ​ជួយថែផ្លូវនេះឱ្យបានដិតដល់ ដើម្បីធានាថាផ្លូវនេះអាចប្រើប្រាស់បានយូរអង្វែង និង​បម្រើ​ផល​ប្រយោជន៍​ជូន​ប្រជាពលរដ្ឋ៕