​អឺរ៉ុប៖ នាយក​ការិយាល័យ​នៅ​អឺរ៉ុប​របស់​អង្គការ​សុខភាព​ពិភពលោក (WHO) បាន​និយាយ​ថា ទ្វីប​នេះ​បាន​ឈាន​ចូល​ដល់​ដំណាក់កាល​នៃ​ជំងឺ​រាតត្បាត​ ដែល​លោក​បាន​ប្រដូច​ទៅ​នឹង​បទ​ឈប់​បាញ់ជាមួយ​នឹង​ក្តី​សង្ឃឹម ​នៃ​សន្តិភាព​ដែល​ពឹង​ផ្អែកលើ​វិធានការ​ជាច្រើន​។

​

​ក្នុងអំឡុងពេល​សន្និសីទ​សារព័ត៌មាន​កាលពី​ថ្ងៃ​ព្រហស្បតិ៍ លោក​វេជ្ជបណ្ឌិត Hans Kluge បាន​និយាយ​ថា ការ​ចាក់​វ៉ាក់សាំង​ការ​ការពារ​ជន​ងាយ​រងគ្រោះ និង​ការ​ទទួល​ខុសត្រូវ​ដោយ​បុគ្គល​នៅតែ​ជា​គន្លឹះ​ ដើម្បី​បន្ថែម​រយៈពេល​នៃ​ការ​ការពារ​កាន់តែ​ខ្ពស់​ទៅ​ថ្ងៃ​អនាគត​។ ​ខណៈ​រដូវរងា​ចុះ​ខ្សោយ​ទៅវិញ​នៅ​អឺរ៉ុប​ភាគច្រើន​ក្នុង​ប៉ុន្មាន​សប្ដាហ៍​ខាងមុខនេះ លោក Kluge បាន​និយាយ​ថា ​មានឱកាស​សម្រាប់​បណ្ដា​ប្រទេស​នៅ​ទូទាំង​ទ្វីប​អឺរ៉ុប​ក្នុង​ការ​គ្រប់​គ្រង​ការ​ចម្លង​វីរុស COVID-19 ដោយ​កត្តា​បី​យ៉ាង​៖ កម្រិត​ខ្ពស់​នៃ​ភាព​ស៊ាំ​ដោយសារ​ការ​ចាក់​វ៉ាក់សាំង​ និង​ការ​ឆ្លង​តាម​ធម្មជាតិ ទំនោរ​វីរុស​ក្នុង​ការ​រាលដាល​តិច​នៅ​ក្នុង​អាកាសធាតុ​ក្តៅ និង​ភាព​ធ្ងន់ធ្ងរ​មាន​កម្រិត​ទាប​នៃ​វីរុស​ប​ម្លែ​ង​ខ្លួន​ថ្មី omicron។

ទោះជា​យ៉ាងណា​លោក​បាន​និយាយ​ថា នេះ​ទាមទារ​ឲ្យ​បង្កើន​ការ​ចែក​រំលែក​វ៉ាក់សាំង​បង្ការ​ឆ្លងកាត់​ព្រំដែន​ ដោយ​លោក​បាន​បញ្ជាក់​ថា វ៉ាក់សាំង​ត្រូវតែ​ផ្តល់​ដល់​មនុស្ស​គ្រប់គ្នា​នៅ​ទូទាំង​ទ្វីប​អឺរ៉ុប និង​លើស​ពីនេះ​។ លោក Kluge បាន​កត់​សម្គាល់​ថា មាន​ករណី​ឆ្លង​វីរុស​ថ្មី​ចំនួន ១២​លាន​នៅ​ទូទាំង​តំបន់អឺរ៉ុប​កាលពី​សប្តាហ៍​មុន ជា​ចំនួន​សរុប​ប្រចាំ​សប្តាហ៍​ខ្ពស់​បំផុត​ក្នុងអំឡុងពេល​ជំងឺ​រាតត្បាត​។ លោក​និយាយ​ថា ការ​កើន​ឡើង​នេះ​ត្រូវ​បាន​ជំរុញ​ដោយ​វីរុស​ប​ម្លែ​ង​ខ្លួន​ថ្មី omicron ឆ្លង​ខ្ពស់ ប៉ុន្តែ​បាន​និយាយ​ថា​ ការ​ចូល​ព្យាបាល​នៅ​បន្ទប់​សង្គ្រោះ​បន្ទាន់​ក្នុង​មន្ទីរពេទ្យ គ្មាន​ការ​កើន​ឡើង​គួរ​ឱ្យ​កត់​សម្គាល់​នោះ​ទេ៕

អត្ថបទ៖ ប៊ុនថន