អគ្គលេខាធិការសម្ព័ន្ធយោធាណាតូ លោក Mark Rutte កាលពីថ្ងៃចន្ទ បានអំពាវនាវឱ្យមានការចំណាយលើវិស័យការពារជាតិកាន់តែខ្ពស់ជាងមុន ដើម្បីធានាបានសន្តិសុខ ខណៈសម្ព័ន្ធនេះ ឈានឆ្ពោះទៅរកគោលដៅនៃការបង្កើនការវិនិយោគផ្នែកការពារជាតិរួមគ្នា។

ថ្លែងទៅកាន់សភារបស់អង្គការណាតូក្នុងទីក្រុងយុបយ៉ាណា(Ljubljana) ប្រទេសស្លូវ៉ានី លោក Rutte បាននិយាយថា សម្ព័ន្ធមិត្តអ៊ឺរ៉ុប និងប្រទេសកាណាដា «បច្ចុប្បន្ននេះកំពុងស្ថិតនៅលើគន្លងមួយ» ដើម្បីនាំយកការចំណាយលើវិស័យការពារជាតិរបស់ខ្លួនឱ្យកាន់តែជិតទៅនឹងការចំណាយរបស់សហរដ្ឋអាមេរិក។

លោក Rutte បាននិយាយថា «នេះគឺជាការចាំបាច់ដើម្បីរក្សា អាត្លង់ទិក អាកទិក អឺរ៉ុប និងសហរដ្ឋអាមេរិកឱ្យមានសុវត្ថិភាព» ដោយកត់សម្គាល់ថា រដ្ឋជាសមាជិកបានប្តេជ្ញាក្នុងការវិនិយោគ៥ភាគរយនៃផលិតផលក្នុងស្រុកសរុប (GDP) លើវិស័យការពារជាតិនៅឆ្នាំ២០៣៥ រួមទាំង៣,៥ភាគរយសម្រាប់ការចំណាយការពារជាតិស្នូល។

បច្ចុប្បន្ននេះ ភាគច្រើនក្នុងចំណោមសមាជិកទាំង៣២ប្រទេសរបស់ណាតូ ចំណាយតិចជាង៣ភាគរយនៃផលិតផលក្នុងស្រុកសរុប(GDP) របស់ពួកគេលើវិស័យការពារជាតិ។ សម័យប្រជុំប្រចាំឆ្នាំរយៈពេល៤ ថ្ងៃរបស់សភាណាតូ ដែលជាស្ថាប័នពិគ្រោះយោបល់សម្រាប់សមាជិកសភាមកពីប្រទេសជាដៃគូ បានបិទបញ្ចប់កាលពីថ្ងៃចន្ទនៅទីក្រុង Ljubljana ដោយមានគណៈប្រតិភូចំនួន២៤៥រូបចូលរួម។

សភាបានអនុម័តសេចក្តីសម្រេចចំនួន៦ ដែលផ្តល់ការណែនាំឱ្យមានភាពធន់កាន់តែខ្លាំងប្រឆាំងនឹងការជ្រៀតជ្រែកពីបរទេស បង្កើនការរារាំង និងការការពារ កិច្ចសហប្រតិបត្តិការសេដ្ឋកិច្ចនិងសន្តិសុខអន្តរអាត្លង់ទិកកាន់តែស៊ីជម្រៅ ស្ថិរភាពកាន់តែប្រសើរនៅក្នុងតំបន់បាល់កង់ខាងលិច ការបន្តគាំទ្រសម្រាប់អ៊ុយក្រែន និងការត្រៀមខ្លួនសម្រាប់សង្គ្រាមប្រឆាំងបច្ចេកវិទ្យានៅពេលអនាគត។