ក្រសួងការបរទេសអ៊ីរ៉ង់ នៅថ្ងៃអង្គារ (ទី១៤ ខែតុលា) នេះ បានរិះគន់ការអំពាវនាវរបស់ប្រធានាធិបតីអាមេរិកលោក Donald Trump ឲ្យមានការសន្ទនាគ្នា ដោយចោទប្រកាន់ទីក្រុងវ៉ាស៊ីនតោន អំពី «ឥរិយាបថអរិភាព និងឧក្រិដ្ឋកម្ម» បន្ទាប់ពីសុន្ទរកថារបស់លោកទៅកាន់សភាអ៊ីស្រាអែល បានប្រាប់អំពីការត្រៀមខ្លួន ដើម្បីធ្វើកិច្ចព្រមព្រៀងជាមួយទីក្រុងតេអេរ៉ង់។

តាមរយៈសេចក្តីថ្លែងការណ៍ ក្រសួងបានរៀបរាប់ថា៖ «បំណងប្រាថ្នាចង់បានសន្តិភាព និងការសន្ទនាដែលបង្ហាញដោយប្រធានាធិបតីសហរដ្ឋអាមេរិក គឺផ្ទុយនឹងការមានឥរិយាបថអរិភាព និងឧក្រិដ្ឋកម្មរបស់សហរដ្ឋអាមេរិក ចំពោះប្រជាជនអ៊ីរ៉ង់»។

គួរបញ្ជាក់ថា កាលពីខែមិថុនា សហរដ្ឋអាមេរិកបានចូលរួមជាមួយអ៊ីស្រាអែល ក្នុងការវាយប្រហារលើទីតាំងនុយក្លេអ៊ែរអ៊ីរ៉ង់ បន្ទាប់ពីកិច្ចចរចានុយក្លេអ៊ែរដោយប្រយោលចំនួន ៥ជុំ ជាមួយទីក្រុងតេអេរ៉ង់ បានជាប់គាំង ជុំវិញបញ្ហានានា ក្នុងនោះរួមទាំងការចម្រាញ់សារធាតុនុយក្លេអ៊ែរផងដែរ។

លោក Trump បានប្រាប់សភា Knesset របស់អ៊ីស្រាអែលកាលពីថ្ងៃចន្ទថា អ៊ីរ៉ង់ «បានរងគ្រោះយ៉ាងខ្លាំង» នៅក្នុងសង្រ្គាមរយៈពេល ១២ថ្ងៃ ប៉ុន្តែថា វាពិតជានឹងក្លាយជារឿងអស្ចារ្យណាស់ ប្រសិនបើកិច្ចព្រមព្រៀងសន្តិភាពមួយ អាចត្រូវបានឈានដល់ រវាងអ៊ីរ៉ង់ និងអ៊ីស្រាអែល។

អ៊ីស្រាអែលបានប្រាប់ថា ការវាយលុកដ៏ធំរបស់ខ្លួនទៅលើមេដឹកនាំយោធាជាន់ខ្ពស់របស់អ៊ីរ៉ង់ អ្នកវិទ្យាសាស្ត្រនុយក្លេអ៊ែរ ទីតាំងចម្រាញ់សារធាតុអ៊ុយរ៉ានីញ៉ូម និងកម្មវិធីមីស៊ីលបាលីស្ទិក គឺវិធានការចាំបាច់ ដើម្បីរារាំងសាធារណរដ្ឋឥស្លាមកុំឲ្យការសម្រេចផែនការដែលត្រូវបានអះអាង ក្នុងការបំផ្លាញអ៊ីស្រាអែល។

អ៊ីរ៉ង់បានបដិសេធយ៉ាងដាច់អហង្ការថា មិនបានប្រឹងប្រែងផលិតអាវុធនុយក្លេអ៊ែរឡើយ។ តែយ៉ាងណាក្ដី ប្រទេសនេះ បានបង្កើនការចម្រាញ់សារធាតុអ៊ុយរ៉ានីញ៉ូមដល់កម្រិតដែលមិនមែនជាកម្មវិធីសន្តិភាពទៀតឡើយ មិនឲ្យមន្ត្រីអធិការកិច្ចអន្តរជាតិចូលត្រួតពិនិត្យទីតាំងនុយក្លេអ៊ែររបស់ខ្លួន ហើយពង្រីកសមត្ថភាពមីស៊ីលបាលីស្ទិករបស់ខ្លួន។ អ៊ីស្រាអែលបាននិយាយថា ថ្មីៗនេះ អ៊ីរ៉ង់បានចាត់វិធានការឆ្ពោះទៅរកការធ្វើទំនើបកម្មអាវុធ៕