រ៉ូកែត Starship ដ៏ធំសម្បើមរបស់ក្រុមហ៊ុន SpaceX បានហោះកាត់ផ្ទៃមេឃពណ៌ក្រហមឆ្អិនឆ្អៅ នៅរដ្ឋ Texas កាលពីថ្ងៃចន្ទ (ទី១៣ ខែតុលា) មុនពេលធ្លាក់មកកាន់ផែនដីវិញដោយជោគជ័យ ខណៈដែលក្រុមហ៊ុន នៅសហរដ្ឋអាមេរិកមួយនេះ ប្រឹងប្រែងធ្វើឲ្យអ្នករិះគន់លែងហ៊ាននិយាយអ្វី បន្ទាប់ពីបានសង្ស័យថា ក្រុមហ៊ុនរបស់លោក Elon Musk អាចបញ្ជូនគម្រោងឋានព្រះចន្ទរបស់អង្គការ NASA បានទាន់ពេលវេលាដែរ ឬទេ។

ជាដំណើរហោះហើរសាកល្បងលើកទី១១ របស់ខ្លួន រ៉ូកែតដ៏ធំសម្បើមបានហោះចេញពីកន្លែងបាញ់បង្ហោះរបស់ក្រុមហ៊ុន Space X នៅភាគខាងត្បូងរដ្ឋ Texas ពោលគឺតែបន្តិចក្រោយម៉ោង ៦:២៥ល្ងាច ម៉ោងក្នុងស្រុក (ត្រូវនឹងម៉ោង ២៣:២៥ ម៉ោងសកល)។ នេះបើយោងតាមរូបភាពវីដេអូផ្សាយផ្ទាល់ដែលបង្ហាញពីការអបអរសាទរយ៉ាងកងរំពងពីក្រុមវិស្វករ។

ផ្នែកខាងក្រោមដែលត្រូវបានគេស្គាល់ថា ឧបករណ៍ជំរុញរ៉ូកែតឈ្មោះ Super Heavy បានចុះចតនៅដែនទឹកឈូងសមុទ្រ តាមការគ្រោងទុក នៅពេលដែលផ្នែកខាងលើ ដែលត្រូវបានគេស្គាល់ថា Starship បានធ្វើដំណើរឆ្លងកាត់លំហ និងបានបញ្ចប់ការសាកល្បង ដោយរត់លើផ្លូវដែលស្រដៀងគ្នាទៅនឹងបេសកកម្មប្រកបដោយជោគជ័យចុងក្រោយ កាលពីខែសីហា។

គួរបញ្ជាក់ថា អង្គការ NASA គ្រោងប្រើប្រាស់រ៉ូកែតដ៏ធំសម្បើម Starship ដែលជារ៉ូកែតដ៏ធំ និងមានឥទ្ធិពលបំផុតរបស់ពិភពលោក នៅក្នុងកិច្ចខិតខំប្រឹងប្រែងរបស់ខ្លួន ដើម្បីបញ្ជូនអវកាសយានិកត្រឡប់ទៅឋានព្រះចន្ទវិញ។ វាក៏ជាគន្លឹះនៃចក្ខុវិស័យដ៏អស្ចារ្យរបស់លោក Musk ក្នុងការនាំមនុស្សទៅកាន់ភពព្រះអង្គារផងដែរ។

បេសកកម្មសាកល្បង កាលពីថ្ងៃចន្ទ ត្រូវបានគេរំពឹងថា នឹងជាលើកចុងក្រោយនៃគំរូ Starship នេះ។ ក្រុមហ៊ុន SpaceX បានបញ្ជាក់ថា ការបង្ហោះបន្ទាប់ នឹងបង្ហាញម៉ូដែលថ្មី Version 3។ ក្រុមហ៊ុនបច្ចេកវិទ្យាអវកាសមួយនេះ អាចចាត់ទុកការបង្ហោះថ្មីបំផុតចំនួន ២លើករបស់ខ្លួនថា ជាជោគជ័យ៕