អតីតប្រធានាធិបតីអាមេរិក លោក Joe Biden បានពោលសរសើរប្រធានាធិបតីបច្ចុប្បន្ន គឺលោក Donald Trump សម្រាប់កិច្ចការដែលលោក និងរដ្ឋបាលរបស់លោក បានធ្វើ រហូតដល់បង្កើតបាននូវកិច្ចព្រមព្រៀងបទឈប់បាញ់ «ថ្មី» នៅតំបន់ហ្កាហ្សា។

លោក Biden ដែលត្រូវបានលោក Trump រិះគន់ជាបន្តបន្ទាប់ ចាប់តាំងពីលោកឡើងកាន់តំណែងនៅដើមឆ្នាំនេះ បាននិយាយថា តំបន់មជ្ឈិមបូព៌ា កំពុងស្ថិតនៅលើផ្លូវឆ្ពោះទៅរកសន្តិភាព។

អតីតមេដឹកនាំអាមេរិករូបនេះ បានលើកឡើងនៅលើបណ្ដាញសង្គម X ថា៖ «ខ្ញុំសូមសរសើរលោកប្រធានាធិបតី Trump និងក្រុមការងាររបស់លោក ចំពោះការបំពេញកិច្ចការរបស់ពួកគេ រហូតធ្វើឲ្យកិច្ចព្រមព្រៀងបទឈប់បាញ់ថ្មីកើតឡើង។ ឥឡូវនេះ ដោយមានការគាំទ្រពីសហរដ្ឋអាមេរិក និងពិភពលោក តំបន់មជ្ឈិមបូព៌ា គឺស្ថិតនៅលើផ្លូវឆ្ពោះទៅកាន់សន្តិភាពដែលខ្ញុំសង្ឃឹមថា នឹងមានភាពយូរអង្វែង ដើម្បីឲ្យប្រជាជនអ៊ីស្រាអែល និងប៉ាឡេស្ទីនរស់នៅដោយមានសន្តិភាព សេចក្តីថ្លៃថ្នូរ និងសុវត្ថិភាពដូចគ្នា»។

តាមរយៈការបង្ហោះសាររបស់លោក លោក Biden ក៏បានផ្តល់តម្លៃផងដែរដល់រដ្ឋបាលរបស់លោក សម្រាប់ការងារដែលខ្លួនបានធ្វើក្នុងរយៈពេល ២ឆ្នាំចុងក្រោយ បន្ទាប់ពីមានការវាយប្រហាររបស់ក្រុមហាម៉ាស លើអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣។

គួរបញ្ជាក់ថា កាលពីលោក Biden នៅកាន់តំណែង អតីតរដ្ឋមន្ត្រីការបរទេសអាមេរិក លោក Antony Blinken បានធ្វើដំណើររាប់សិបដងទៅកាន់មជ្ឈិមបូព៌ា បន្ទាប់ពីមានការវាយប្រហារថ្ងៃទី៧ ខែតុលានោះ ដែលចុងក្រោយព្យាយាមដាក់សម្ពាធលើភាគីទាំង២ ឲ្យព្រមទទួលយកបទឈប់បាញ់មួយ ខណៈដែលអ៊ីស្រាអែលបានធ្វើការវាយប្រហារសងសឹកឥតឈប់ឈរ។

នៅទីបំផុត អ៊ីស្រាអែល និងក្រុមហាម៉ាស បានយល់ព្រមលើបទឈប់បាញ់ ក្នុងខែមករា មុនពេលលោក Biden ចាកចេញពីតំណែង ដោយមានបេសកជនបន្ទាប់របស់លោក Trump គាំទ្រផ្នែកការទូត។ ប៉ុន្តែក្នុងខែមីនា អ៊ីស្រាអែលបានចាប់ផ្ដើមប្រតិបត្តិការយោធាយ៉ាងធំឡើងវិញ នៅតំបន់ហ្កាហ្សា ហើយបិទខ្ទប់ការនាំស្បៀងអាហារចូលទាំងអស់៕