យោធាអ៊ីស្រាអែល បានប្រាប់ឲ្យដឹងថា នៅថ្ងៃអង្គារ (ទី១៤ ខែតុលា) នេះ ខ្លួនបានបើកការបាញ់ប្រហារ ដើម្បីលុបបំបាត់ការគំរាមកំហែងដែលខ្លួនបាននិយាយថា ត្រូវបានបង្កឡើងដោយជនសង្ស័យ ដែលបានចូលទៅកៀកកងកម្លាំងរបស់ខ្លួន នៅភាគខាងជើងតំបន់ហ្កាហ្សាស្ទ្រីប ហើយអាជ្ញាធរសុខាភិបាលក្នុងដែនដីនេះ បានបញ្ជាក់ថា យ៉ាងហោចណាស់ជនជាតិប៉ាឡេស្ទីន ៦នាក់ ត្រូវបានសម្លាប់ដោយសារការបាញ់របស់អ៊ីស្រាអែល។

យោធាបានឲ្យដឹងបន្ថែមថា ជនសង្ស័យបានឆ្លងកាត់ព្រំដែន អំឡុងការដកចេញដំបូងរបស់កងកម្លាំងអ៊ីស្រាអែល ក្រោមផែនការបទឈប់បាញ់សម្របសម្រួលដោយសហរដ្ឋអាមេរិក ដោយនេះជាការរំលោភលើកិច្ចព្រមព្រៀង។

ហើយអាជ្ញាធរសុខាភិបាល ក្នុងតំបន់ហ្កាហ្សា បានអះអាងថា នៅថ្ងៃអង្គារនេះ យោធាអ៊ីស្រាអែលបានសម្លាប់ជនជាតិប៉ាឡេស្ទីន ៦នាក់ នៅក្នុងឧប្បត្តិហេតុ ២ផ្សេងគ្នា នៅទូទាំងដែនដីនេះ។

គួរបញ្ជាក់ថា កាលពីថ្ងៃចន្ទ ក្រុមហាម៉ាសបានដោះលែងចំណាប់ថ្នូរអ៊ីស្រាអែលនៅរស់ចុងក្រោយ ពីតំបន់ហ្កាហ្សា ហើយអ៊ីស្រាអែល បានបញ្ជូនរថយន្តដឹកអ្នកជាប់ឃុំប៉ាឡេស្ទីនទៅកាន់ផ្ទះសម្បែងរបស់ពួកគេវិញ ក្រោមកិច្ចព្រមព្រៀងបទឈប់បាញ់ ខណៈដែលប្រធានាធិបតីអាមេរិក លោក Donald Trump បានប្រកាសបញ្ចប់សង្គ្រាមរយៈពេល ២ឆ្នាំ ដែលបានរំខានយ៉ាងខ្លាំងដល់តំបន់មជ្ឈិមបូព៌ាដ៏ទូលំទូលាយ៕