ប្រធានាធិបតីអាមេរិក លោក Donald Trump នៅថ្ងៃអង្គារ (ទី១៤ ខែតុលា) នេះ បានបញ្ជាក់ថា លោកនឹងសម្រេចនូវអ្វីដែលលោកគិតថា ត្រឹមត្រូវ ជុំវិញដំណោះស្រាយរយៈពេលវែង ចំពោះជម្លោះអ៊ីស្រាអែល និងប៉ាឡេស្ទីន។

លោក Trump បានធ្វើទស្សនកិច្ចរយៈពេលខ្លី នៅតំបន់មជ្ឈិមបូព៌ា ដើម្បីចូលរួមជាមួយបណ្ដាមេដឹកនាំក្នុងតំបន់ កាលពីថ្ងៃចន្ទ ក្នុងពិធីចុះហត្ថលេខាលើសេចក្តីប្រកាសមួយ ដែលមានគោលបំណងជួយពង្រឹងដល់បទឈប់បាញ់ នៅតំបន់ហ្កាហ្សា បន្ទាប់ពីសង្គ្រាមផ្ទុះឡើងអស់រយៈពេល ២ឆ្នាំ។

ដោយបាននិងកំពុងដោះស្រាយជម្លោះអ៊ីស្រាអែល-ប៉ាឡេស្ទីនអស់រយៈពេលជាច្រើនទសវត្សរ៍ លោក Trump បានកត់សម្គាល់ថា៖ «មនុស្សជាច្រើនពេញចិត្តដំណោះស្រាយរដ្ឋតែមួយ អ្នកខ្លះពេញចិត្តដំណោះស្រាយរដ្ឋ២។ អ៊ីចឹង យើងនឹងយើងបានឃើញថា តើនឹងមានអ្វីកើតឡើង»។

មេដឹកនាំអាមេរិករូបនេះ បានប្រាប់អ្នកសារព័ត៌មាននៅលើយន្តហោះ Air Force One ថា៖ «ខ្ញុំនឹងសម្រេចនូវអ្វីដែលខ្ញុំគិតថា ត្រឹមត្រូវ ប៉ុន្តែខ្ញុំនឹងធ្វើការជាមួយបណ្ដារដ្ឋ និងប្រទេសដទៃទៀត»។

គួរដឹងថា ប្រហែល ១ភាគ៤ នៃរដ្ឋជាសមាជិកចំនួន ១៩៣ របស់អង្គការសហប្រជាជាតិទទួលស្គាល់រដ្ឋប៉ាឡេស្ទីនដែលបានប្រកាសនៅឆ្នាំ១៩៨៨ ដោយមេដឹកនាំប៉ាឡេស្ទីននិរទេសខ្លួន។ សហរដ្ឋអាមេរិកដែលជាសម្ព័ន្ធមិត្តជិតស្និទ្ធបំផុតរបស់អ៊ីស្រាអែល បានរិះគន់ការសម្រេចកាលពីខែមុន ពីសំណាក់សម្ព័ន្ធមិត្តរបស់ខ្លួនផ្សេងទៀត ដែលរួមមានទាំងអង់គ្លេស និងកាណាដាផងដែរ ក្នុងការទទួលស្គាល់ប៉ាឡេស្ទីនជារដ្ឋមួយ៕