គណបក្សប្រឆាំងធំៗរបស់ប្រទេសជប៉ុន គ្រោងនឹងបើកកិច្ចពិភាក្សាដ៏មានហានិភ័យមួយ នៅថ្ងៃអង្គារ (ទី១៤ ខែតុលា) ក្នុងគោលបំណងស្វែងរកបេក្ខជនរួមមួយរូប សម្រាប់តំណែងនាយករដ្ឋមន្ត្រី និងទម្លាក់គណបក្សកាន់អំណាច។

កិច្ចពិភាក្សានេះកើតមានឡើងបន្ទាប់ពីក្រុមចម្រុះដែលកំពុងកាន់អំណាច បានដួលរលំ កាលពីសប្តាហ៍មុន ដោយបានផ្ដល់ហានិភ័យដល់លោកស្រី Sanae Takaichi ក្នុងការបានក្លាយជានាយករដ្ឋមន្ត្រីស្ត្រីដំបូងគេរបស់ប្រទេស។

ជប៉ុនបានស្ថិតក្នុងស្ថានភាពមិនច្បាស់លាស់ផ្នែកនយោបាយ ជុំវិញថា តើប្លុកប្រឆាំងនឹងរួបរួមគ្នាដែរ ឬទេ បន្ទាប់ពីដៃគូ គឺគណបក្សដ៏តូច Komeito បានដកខ្លួនចេញពីសម្ព័ន្ធភាពរយៈពេល ២៦ឆ្នាំរបស់ខ្លួន ជាមួយគណបក្សប្រជាធិបតេយ្យសេរីនិយម (LDP) ដែលកំពុងកាន់អំណាច។

ការរួបរួមគ្នាមួយ នឹងផ្តល់ឲ្យក្រុមប្រឆាំងនូវសំឡេងឆ្នោតគ្រប់គ្រាន់ ដើម្បីតែងតាំងឈ្មោះនាយករដ្ឋមន្ត្រី និងរារាំងលោកស្រី Takaichi ដែលត្រូវបានជ្រើសរើសជាប្រធានបក្ស LDP កាលពីជាង ១សប្តាហ៍មុន ប៉ុន្តែត្រូវការការអនុម័តពីសមាជិកសភា ដើម្បីក្លាយជានាយករដ្ឋមន្ត្រីផ្លូវការ។

ប្រមុខគណបក្សប្រជាធិបតេយ្យ ដើម្បីប្រជាជន (DPP) ដែលជាក្រុមប្រឆាំងដ៏ធំជាងគេទី៣ នៅក្នុងសភាជាន់ទាប គឺលោក Yuichiro Tamaki បាននិយាយថា អគ្គលេខាធិការនៃគណបក្សប្រឆាំងធំៗចំនួន ៣ នឹងជួបប្រជុំគ្នានៅល្ងាចថ្ងៃអង្គារនេះ ដើម្បីស្វែងរកនូវលទ្ធភាពរួបរួមគ្នា។ តែយ៉ាងណាក្ដី លោកបានក្រើនរំលឹកថា គោលនយោបាយរបស់គណបក្សទាំងនោះ មានភាពខុសគ្នាខ្លាំងនៅក្នុងវិស័យសំខាន់ៗ ក្នុងនោះរួមមានទាំងវិស័យការពារជាតិ និងការប្រើប្រាស់ថាមពលនុយក្លេអ៊ែរផងដែរ។

លោកបានប្រាប់សន្និសីទសារព័ត៌មានមួយថា៖ «ប្រសិនបើយើងរួមគ្នាបង្កើតបានរដ្ឋាភិបាលចម្រុះ ការធ្វើឲ្យគោលនយោបាយសំខាន់ៗស្របគ្នា គឺជារឿងចាំបាច់»។ លោក Tamaki ដែលបាននិយាយកាលពីសប្តាហ៍មុនថា លោកនឹងសុខចិត្តឈរឈ្មោះជានាយករដ្ឋមន្ត្រីនោះ បានបន្ថែមថា «ប្រសិនបើមិនមានការតម្រឹមឲ្យត្រូវគ្នាទេ រដ្ឋបាលនឹងមិនមានស្ថិរភាពទេ»៕