ប្រធានាធិបតីម៉ាដាហ្គាស្ការ លោក Andry Rajoelina នៅថ្ងៃអង្គារ (ទី១៤ ខែតុលា) នេះ បានឲ្យដឹងថា លោកបានរំលាយសភាជាន់ទាប ដោយធ្វើឲ្យមានការប្រឈមមុខដាក់គ្នាកាន់តែខ្លាំងឡើង ជាមួយក្រុមបាតុករដឹកនាំដោយយុវជន និងយោធា ជាការតវ៉ាដែលបានបង្ខំឲ្យលោកភៀសខ្លួនចេញពីប្រទេសកោះនេះ។

ក្រឹត្យប្រធានាធិបតីនៅលើបណ្ដាញសង្គម Facebook បានឲ្យដឹងថា លោក Rajoelina វ័យ ៥១ឆ្នាំ បានពិគ្រោះជាមួយថ្នាក់ដឹកនាំរដ្ឋសភា និងព្រឹទ្ធសភា ប៉ុន្តែភាពស្របច្បាប់នៃចំណាត់ការរបស់លោក គឺមិនច្បាស់លាស់ឡើយ។

នៅក្នុងសុន្ទរកថាពីទីកន្លែងដែលមិនត្រូវបានប្រាប់ឲ្យដឹង កាលពីល្ងាចថ្ងៃចន្ទ លោក Rajoelina បានបដិសេធមិនព្រមចុះចេញពីតំណែង បើទោះបីជាមានការតវ៉ាជាច្រើនសប្តាហ៍របស់ក្រុមយុវជនជំនាន់ក្រោយ Gen Z ដែលទាមទារឲ្យលោកលាលែងពីតំណែង និងការប្រឆាំងពីសំណាក់កងទ័ពគ្រប់ទិសទីក៏ដោយ។

លោក Rajoelina បាននិយាយថា រូបលោកត្រូវបង្ខំផ្លាស់ទៅកន្លែងមានសុវត្ថិភាព ដោយសារតែមានការគំរាមកំហែងដល់អាយុជីវិត។ មន្ត្រីបក្សប្រឆាំង ប្រភពយោធា និងអ្នកការទូតបរទេសម្នាក់ បានប្រាប់សារព័ត៌មាន Reuters ថា លោកបានភៀសខ្លួនចេញពីប្រទេស កាលពីថ្ងៃអាទិត្យចុងសប្ដាហ៍កន្លងមក តាមយន្តហោះយោធាបារាំង។

តាមរយៈការប្រកាសដាច់ដោយឡែកមួយទៀត នៅលើបណ្ដាញសង្គម X លោក Rajoelina បានបញ្ជាក់ថា ការសម្រេចចិត្តរំលាយសភាជាតិដែលនឹងបើកផ្លូវឲ្យមានការបោះឆ្នោតថ្មីដែលនឹងប្រព្រឹត្តទៅក្នុងរយៈពេល ៦០ថ្ងៃ គឺ «ចាំបាច់ ដើម្បីស្តារសណ្តាប់ធ្នាប់ឡើងវិញ» នៅក្នុងប្រទេសម៉ាដាហ្គាស្ការ។ លោកបានថ្លែងថា៖ «ប្រជាជនត្រូវតែមានឱកាសប្រើសិទ្ធិជាថ្មីម្ដងទៀត។ វាគឺដល់ពេលវេលារបស់យុវជនហើយ»។

តែមេបក្សប្រឆាំង នៅក្នុងរដ្ឋសភា បានជំទាស់ ដោយលោក Siteny Randrianasoloniaiko ដែលមានតួនាទីជាអនុប្រធានសភាផងដែរនោះ បាននិយាយថា៖ «ក្រឹត្យនេះមិនស្របច្បាប់នោះទេ។ ប្រធានរដ្ឋសភា បញ្ជាក់ថា លោកមិនត្រូវបានគេពិគ្រោះយោបល់ជាមួយឡើយ»៕