នាយករដ្ឋមន្ត្រីអេស្ប៉ាញ លោក Pedro Sanchez នៅថ្ងៃអង្គារ (ទី១៤ ខែតុលា) នេះ ថា បទឈប់បាញ់ រវាងក្រុមហាម៉ាស និងអ៊ីស្រាអែល មិនត្រូវបានមកដោយការផ្ដល់សេរីភាពដល់អ្នកដែលត្រូវទទួលខុសត្រូវ ចំពោះ «អំពើប្រល័យពូជសាសន៍» នៅក្នុងតំបន់ហ្កាហ្សានោះឡើយ។

នាយករដ្ឋមន្ត្រីសង្គមនិយម បាននិយាយក្នុងបទសម្ភាសន៍ជាមួយវិទ្យុ Cadena Ser ថា៖ «សន្តិភាពមិនអាចមានន័យថា ត្រូវបំភ្លេចចោលនោះឡើយ ពោលគឺវាមិនមានន័យថា និទណ្ឌភាពត្រូវកើតមានឡើងនោះទេ»។

នៅពេលត្រូវបានសួរ អំពីលទ្ធភាពនៃការមានដំណើរការផ្លូវច្បាប់ ប្រឆាំងនឹងនាយករដ្ឋមន្ត្រីអ៊ីស្រាអែល លោក Benjamin Netanyahu លោកបានបន្ថែមថា៖ «អ្នកដែលដើរតួនាទីយ៉ាងសំខាន់ ក្នុងអំពើប្រល័យពូជសាសន៍ដែលត្រូវបានប្រព្រឹត្តិនៅតំបន់ហ្កាហ្សា ត្រូវតែបាននាំខ្លួនទៅកាត់ទោស ពោលគឺមិនអាចមាននិទណ្ឌភាពនោះទេ»។

គួរបញ្ជាក់ថា អេស្ប៉ាញដែលជាប្រទេសមួយក្នុងចំណោមប្រទេសរិះគន់ខ្លាំងបំផុត នៅអឺរ៉ុប ចំពោះការវាយលុករបស់អ៊ីស្រាអែល នៅតំបន់ហ្កាហ្សា បានប្រកាសកាលពីខែកញ្ញាថា រដ្ឋអាជ្ញារបស់ខ្លួន នឹងស៊ើបអង្កេត «ការរំលោភសិទ្ធិមនុស្សធ្ងន់ធ្ងរ» នៅដែនដីប៉ាឡេស្ទីន ដោយសហការជាមួយតុលាការឧក្រិដ្ឋកម្មអន្តរជាតិ។ តុលាការបានចេញដីកាចាប់ខ្លួន លោក Netanyahu និងអតីតរដ្ឋមន្ត្រីការពារជាតិអ៊ីស្រាអែល លោក Yoav Gallant។

ជាមួយគ្នានេះ លោក Sanchez ដែលបានចូលរួមកិច្ចប្រជុំកំពូលសន្តិភាព ស្ដីពីតំបន់ហ្កាហ្សា ក្នុងប្រទេសអេហ្ស៊ីប កាលពីថ្ងៃចន្ទ បានបញ្ជាក់សារជាថ្មីថា ការហាមប្រាមអាវុធរបស់អេស្ប៉ាញ លើការដឹកជញ្ជូនទៅកាន់ និងពីអ៊ីស្រាអែល នៅតែមានដដែល៕