អគ្គិភ័យ ដែលបានឆាបឆេះរោងចក្រកាត់ដេរ និងឃ្លាំងផ្ទុកសារធាតុគីមី ក្នុងរដ្ឋធានីរបស់ប្រទេសបង់ក្លាដែស បានបណ្តាលឲ្យមនុស្សយ៉ាងតិច ៩នាក់ បានបាត់បង់ជីវីត និងជាច្រើននាក់ផ្សេងទៀតរងរបួស។

មន្ត្រីពន្លត់អគ្គិភ័យឈ្មោះ Talha bin Jashim បាននិយាយថា អគ្គិភ័យ នៅថ្ងៃអង្គារ (ទី១៤ ខែតុលា) នេះ បានកើតឡើងនៅក្នុងតំបន់ Mirpur នៃទីក្រុង Dhaka ហើយត្រូវបានគេជឿថា បានចាប់ផ្តើមឆាបឆេះចេញពីជាន់ទី៣ នៃអគាររោងចក្រកាត់ដេរកម្ពស់ ៧ជាន់។

លោកបានឲ្យដឹងទៀតថា ក្រុមអ្នកជួយសង្គ្រោះបានរកឃើញសាកសពយ៉ាងហោចណាស់ ៩នាក់ ហើយមនុស្សជាច្រើននាក់ផ្សេងទៀត បានរងរបួស។ ហើយលោកបានបន្ថែមថា ចំនួនអ្នកស្លាប់ និងរបួស អាចនឹងកើនឡើង។ អណ្ដាតភ្លើងត្រូវបានគ្រប់គ្រងបាន នាពេលល្ងាច ហើយប្រតិបត្តិការជួយសង្គ្រោះ កំពុងបន្តធ្វើ។

បង់ក្លាដែស គឺជាប្រទេសមានឧស្សាហកម្មកាត់ដេរធំជាងគេទី២ របស់ពិភពលោក បន្ទាប់ពីប្រទេសចិន ហើយវិស័យនេះ បានផ្ដល់ការងារដល់មនុស្សប្រហែល ៤លាននាក់ ដែលភាគច្រើនជាស្ត្រី។

ឧស្សាហកម្មដែលរកចំណូលបានប្រហែល ៤០ពាន់លានដុល្លារ ក្នុងមួយឆ្នាំ ដោយសារការនាំចេញ ដែលជាចម្បងទៅកាន់សហរដ្ឋអាមេរិក និងអឺរ៉ុបនោះ មានប្រវត្តិគ្រោះថ្នាក់ និងអគ្គិភ័យ ដែលត្រូវបានស្ដីបន្ទោសថា មកពីការត្រួតពិនិត្យមិនដិតដល់ និងការរំលោភលើនីតិវិធីសាង់សង់អគារ៕