តុលាការព្រហ្មទណ្ឌអន្តរជាតិ (ICC) សម្រេចដកសិទ្ធិប្រធានរដ្ឋអាជ្ញា លោក Karim Khan ចេញពីសំណុំរឿងឧក្រិដ្ឋកម្មសង្គ្រាម ប្រឆាំងនឹងអតីតប្រធានាធិបតីហ្វីលីពីន លោក Rodrigo Duterte ដោយសារលទ្ធភាពនៃការមានជម្លោះផលប្រយោជន៍។ នេះបើយោងតាមឯកសារច្បាប់ចម្លងដែលសារព័ត៌មាន Reuters បានឃើញ។

សេចក្តីសម្រេចនេះ គឺជាការប៉ះពាល់បន្ថែមដ៏ធំមួយផ្សេងទៀត ចំពោះលោក Khan ដែលបានលាលែងពីតំណែង កាលពីខែឧសភា អំឡុងពេលមានការបន្តការស៊ើបអង្កេតរបស់អង្គការសហប្រជាជាតិ (UN) ជុំវិញការចោទប្រកាន់ពីការប្រព្រឹត្តិមិនសមរម្យ ពាក់ព័ន្ធនឹងផ្លូវភេទ។ ឥឡូវនេះ រូបលោកក៏ត្រូវបានរារាំងមិនឲ្យចូលរួម ក្នុងដំណើរការកាត់ទោសលើលោក Duterte ជាសំណុំរឿងសកម្មធំតែមួយគត់រង់ចាំនៅតុលាការ ដែលកំពុងជួបនឹងបញ្ហាលំបាករួចហើយ ដោយសារទណ្ឌកម្មរបស់សហរដ្ឋអាមេរិក។

កាលពីខែសីហា មេធាវីការពារក្តីរបស់លោក Duterte បានស្វែងរកការដកសិទ្ធិរបស់លោក Khan ដោយលើកហេតុផលថា ការពាក់ព័ន្ធរបស់លោក នៅក្នុងទំនាក់ទំនងរបស់តុលាការ ជាមួយជនរងគ្រោះ ជុំវិញសង្គ្រាមគ្រឿងញៀនរបស់លោក Duterte គឺជាជម្លោះផលប្រយោជន៍។

ច្បាប់ចម្លងនៃសេចក្តីសម្រេចដែលត្រូវបានឃើញដោយសារព័ត៌មាន Reuters បានបង្ហាញថា មេធាវីការពារក្តី បានបញ្ជាក់ថា លោក Khan មិនគួរមានតួនាទីទៀតទេ ក្នុងសំណុំរឿងនេះ ដោយសារតែលោកតំណាងឲ្យគណៈកម្មការសិទ្ធិមនុស្សហ្វីលីពីន (PHRC) ក្នុងការដាក់ឈ្មោះលោក Duterte ជាជនសង្ស័យធំជាងគេ ហើយហេតុដូច្នេះ លោកមិនអាចធ្វើការស៊ើបអង្កេត ដោយមិនមានភាពលម្អៀងបាននោះឡើយ។

គួរដឹងថា លោក Duterte ដែលកាន់តំណែងពីឆ្នាំ២០១៦ ដល់ឆ្នាំ២០២២ ត្រូវបានចាប់ខ្លួន និងនាំទៅកាន់ទីក្រុងឡាអេ ប្រទេសហូឡង់ ក្នុងខែមីនា តាមដីកាចាប់ខ្លួនដែលភ្ជាប់រូបលោកទៅនឹងអំពើឃាតកម្មដែលត្រូវបានប្រព្រឹត្ត ក្នុងអំឡុងពេលមានសង្គ្រាមបោសម្អាតគ្រឿងញៀន នៅក្នុងប្រទេសហ្វីលីពីន ជាយុទ្ធនាការដែលអ្នកជួញដូរ និងអ្នកប្រើប្រាស់គ្រឿងញៀនរាប់ពាន់នាក់ត្រូវបានសម្លាប់។ លោកបានបញ្ជាក់ថា ការចាប់ខ្លួនលោក គឺខុសច្បាប់ និងដូចជាការចាប់ជំរិត៕