​ចិន៖ ពិធី​បើក​ព្រឹត្តិការណ៍​កីឡា​អូឡាំពិក​រដូវរងាបាន​ប្រព្រឹត្ត​ទៅក្នុង​រដ្ឋធានី​ប៉េកាំង​ប្រទេស​ចិន​។ ទីក្រុង​ប៉េកាំងគឺជា​ទីក្រុង​ដំបូង​គេ​ដែលរៀបចំ​ព្រឹត្តិការណ៍​កីឡា​អូឡាំពិក​រដូវក្តៅ និង​រដូវរងា ហើយ​កំពុង​ប្រើប្រាស់​ឡើងវិញ​នូវ​ពហុកីឡាដ្ឋាន Bird's Nest ដែល​ត្រូវបានសាង​សង់ឡើង​សម្រាប់​ការប្រកួត​កីឡា​រដូវក្តៅ​ឆ្នាំ២០០៨។

​ប្រធានាធិបតី​ចិនលោក Xi Jinping បាន​គ្រវី​ដៃ​ទៅកាន់​គណៈប្រតិភូ​កីឡា​ចិន នៅពេល​ពួកគេ​ដើរចូល​ទៅក្នុង​ទីលាន​ពិធី​បើក​ការប្រកួត​កីឡា​អូឡាំពិក​រដូវរងា​ឆ្នាំ២០២២ ដែល​ប្រារព្ធនៅ​ពហុ​កីឡដ្ឋាន​ជាតិ​ក្នុង​ទីក្រុង​ប៉េកាំង​។ ប្រធានបទ​នៃ​ពិធី​នេះ​គឺ "​ពិភពលោក​តែមួយ គ្រួសារ​តែមួយ​"។ អ្នករៀបចំ​បាន​កាត់បន្ថយ​រយៈពេលព្រឹត្តិការណ៍​ខ្លី​ជាងពិធី​បើក ភាគច្រើន​ដើម្បី​កំណត់​ហានិភ័យ​នៃ​ការឆ្លង​វីរុស​។ អត្ត​ព​លិ​កបាន​ដើរចូល​ទៅក្នុងពហុកីឡាដ្ឋាន​ដោយ​ពាក់​ម៉ាស់​។ ​សហរដ្ឋអាមេរិក និង​បណ្តា​ប្រទេស​មួយចំនួនទៀត​មិនបាន​បញ្ជូន​មន្ត្រីរដ្ឋាភិបាលមកចូលរួម​ការប្រកួត​កីឡា​នេះ​ទេ ជា​ផ្នែក​មួយ​នៃ​ការធ្វើ​ពហិការផ្នែកការទូត​ប្រឆាំង​ទៅនឹងការរំលោភ​សិទ្ធិមនុស្ស ​ដែល​ត្រូវបាន​ចោទប្រកាន់​លើ​ប្រទេស​ចិន​។

វត្តមាន​នៅក្នុង​ពិធី​នេះមាន​មេដឹកនាំ​ពិភពលោក និង​ប្រធាន​អង្គការ​អន្តរជាតិ រួមទាំងប្រធាន​គណៈកម្មាធិការ​អូឡាំពិក​អន្តរជាតិ (IOC) លោក Thomas Bach និង​អគ្គលេខាធិ​ការ​អង្គការសហប្រជាជាតិលោក Antonio Guterres។ ប្រធានាធិបតី​រុស្ស៊ីលោក Vladimir Putin ស្ថិតក្នុង​ចំណោម​ឥស្សរជន​បរទេសដែល​បាន​ចូលរួម​ក្នុង​ពិធី​។ អ្នក​ចូល​ទស្សនា​មាន​ចំនួន​កំណត់ ដែល​នឹង​មានឱកាស​លើកទឹកចិត្ត​អត្ត​ព​លិ​កដោយផ្ទាល់​នៅក្នុង​ព្រឹត្តិការណ៍ ខណៈ​អ្នករៀបចំ​មិនបាន​លក់​សំបុត្រ​ដល់​សាធារណជន​ទូទៅនោះទេ ជា​ផ្នែក​នៃ​វិធានការ​ទប់ស្កាត់ការឆ្លង​វីរុស៕

អត្ថបទ៖ ប៊ុនថន