​អឺរ៉ុប៖ អង្គការ​ NATO កំពុង​បន្តធ្វើ​សមយុទ្ធ​យោធា​នៅ​សមុទ្រ​មេ​ឌី​ទែ​រ៉ា​ណេ និង​សមុទ្រ​អា​ទ្រា​ទីក​ (Adriatic) ក្នុង​ពេល​មាន​ភាព​តានតឹងនៅ​អឺរ៉ុប​ខាងកើតជុំវិញ​ការ​បង្កើន​យោធា​រុស្ស៊ី​នៅ​ជិត​ព្រំដែន​អ៊ុយ​ក្រែ​ន​។ សមយុទ្ធ Neptune Strike 2022 រួមមាន​ក្រុម​នាវា​ផ្ទុក​យន្តហោះ​អាមេរិក​នាំមុខ​ដោយ​នាវា​ផ្ទុក​យន្តហោះ USS Truman ខណៈ​យន្តហោះ​ចម្បាំង​ F-18 ច្រើន​គ្រឿង​បាន​ហោះហើរ​ពីលើ​រដ្ឋ​បាល់​ទិ​ក ប្រទេស​ប៉ូឡូញ រូ​ម៉ា​នី និង​សមុទ្រ Ionian។​

​កងទ័ពជើងទឹក​ប្រទេស​អ៊ីតាលី ក្រិ​ក អាល្លឺម៉ង់ និង​អេ​ស្ប៉ា​ញក៏បាន​ចូលរួម​ក្នុង​សមយុទ្ធ​នេះដែរ​។ អង្គការ​ NATO​ បាននឹងកំពុង​ពង្រឹង​ការការពារ​របស់ខ្លួនជុំវិញ​សម្ព័ន្ធមិត្ត​នៅ​អឺរ៉ុបខាងកើត​ចាប់តាំងពី​ចុងឆ្នាំ​មុន​។ ប្រទេស​ដា​ណឺ​ម៉ាក​បាន​និយាយថា ខ្លួន​កំពុង​បញ្ជូន​នាវា និង​យន្តហោះ​ចម្បាំង F-16 ទៅកាន់​ប្រទេស​លី​ទុយ​អា​នី ហើយ​ប្រទេស​អេ​ស្ប៉ា​ញកំពុង​បញ្ជូន​យន្តហោះ​ចម្បាំង​ចំនួន ៤គ្រឿង​ទៅកាន់​ប្រទេស​ប៊ុលហ្គារី និង​នាវា​ចំនួន ៣គ្រឿង​ទៅកាន់​សមុទ្រ​ខ្មៅ ដើម្បី​ចូលរួម​ជាមួយ​កង​ទ័ព​ជើងទឹក​របស់​អង្គការ​ NATO​។​ ​ប្រទេស​ហូ​ឡង់មាន​ផែនការ​បញ្ជូន​យន្តហោះ​ចម្បាំងទៅកាន់​ប្រទេស​ប៊ុលហ្គារីនៅក្នុង​ខែមេសា​។ វិធានការ​យោធាបាន​កើតមានឡើង​ក្នុងពេល​មាន​ភាពជាប់គាំង​លើ​ការចរចា​ជាមួយ​​រុស្ស៊ី ជុំវិញ​ការបង្កើន​កងទ័ពរុស្ស៊ីនៅ​ព្រំដែនប្រទេស​​អ៊ុយ​ក្រែ​ន៕​

អត្ថបទ៖ ប៊ុនថន