អ៊ុយក្រែន៖ ទាហានអ៊ុយក្រែនកំពុងទទួលការបណ្តុះបណ្តាលដោយយោធាសហរដ្ឋអាមេរិក ដែលត្រូវបានបង្រៀនពីរបៀបប្រើប្រាស់អាវុធដែលរចនាឡើងដើម្បីបំផ្លាញលេណដ្ឋានរឹងមាំ ជាអាវុធមួយប្រភេទក្នុងចំណោមអាវុធដែលរដ្ឋាភិបាលសហរដ្ឋអាមេរិកបញ្ជូនមក ដើម្បីជួយដល់ទីក្រុងគៀវក្នុងពេលមានការព្រួយបារម្ភកាន់តែខ្លាំងឡើង លើការឈ្លានពានរបស់រុស្ស៊ីមកលើប្រទេសអ៊ុយក្រែន។
ការហ្វឹកហ្វឺនដែលបានបើកឱ្យអ្នកសារព័ត៌មានចូលថតបានធ្វើឡើងនៅជាយក្រុង Lviv ភាគខាងលិចប្រទេសអ៊ុយក្រែន។ ថ្លែងទៅកាន់អ្នកសារព័ត៌មាន ប្រធានផ្នែកហ្វឹកហ្វឺនយោធាអ៊ុយក្រែនលោកវរសេនីយ៍ឯក Andriy Bestyuk បានសរសើរសព្វាវុធប្រភេទនេះដោយលោកនិយាយថា វាមានសមត្ថភាពក្នុងការបំផ្លាញរចនាសម្ព័ន្ធដែលសត្រូវអាចលាក់ខ្លួន។ អាវុធនេះក៏នឹងបញ្ឈប់រថពាសដែកក្នុងការវាយប្រហារ ហើយប្រសិនបើការប្រយុទ្ធស្ថិតនៅក្នុងតំបន់ទីក្រុង វានឹងអនុញ្ញាតឱ្យយើងបាញ់លើរចនាសម្ព័ន្ធនៅខាងក្រោយ ដែលមានសត្រូវលាក់ខ្លួន។
ខណៈកងកម្លាំងរបស់ប្រទេសរុស្ស៊ីមានទំហំធំ និងមានឥទ្ធិពលជាងប្រទេសអ៊ុយក្រែន ការបះបោរដែលគាំទ្រដោយអាវុធ និងការហ្វឹកហ្វឺនដែលផ្តល់មូលនិធិដោយសហរដ្ឋអាមេរិកអាចរារាំងការការឈ្លានពានទ្រង់ទ្រាយធំ។ ប្រទេសរុស្ស៊ីបានបដិសេធថា ខ្លួនគ្មានផែនការសម្រាប់ការវាយលុកប្រទេសអ៊ុយក្រែននោះទេ ប៉ុន្តែបានទាមទារការសន្យាពីអង្គការ NATO ក្នុងការរក្សាប្រទេសអ៊ុយក្រែនមិនឲ្យចូលក្នុងសម្ព័ន្ធភាពអង្គការនេះ បញ្ឈប់ការដាក់ពង្រាយអាវុធរបស់ NATO នៅជិតព្រំដែនរុស្ស៊ី និងដកកងកម្លាំង NATO ចេញពីអឺរ៉ុបខាងកើត។ ប៉ុន្តែអង្គការ NATO និងសហរដ្ឋអាមេរិកចាត់ទុកការទាមទារទាំងនេះថា មិនអាចទៅរួច៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
