ចំនួននៃការបញ្ឈប់បុគ្គលិកសហព័ន្ធរបស់សហរដ្ឋអាមេរិកដោយសារការបិទរដ្ឋាភិបាលត្រូវបានកែសម្រួលចុះ កាលពីថ្ងៃអង្គារ ១៤ តុលា ដែលបង្ហាញថា សេចក្តីថ្លែងការណ៍ដំបូងរបស់រដ្ឋបាលលោក Trump អំពីការកាត់បន្ថយការងារ មានមហិច្ឆតាខ្លាំងណាស់។

រដ្ឋបាលលោក Trump បានបណ្តេញនិយោជិតចំនួន ៤.១០៨ នាក់ ចាប់តាំងពីថ្ងៃទី ១ ខែតុលា ដែលជាថ្ងៃដែលរដ្ឋាភិបាលអាមេរិកចាប់ផ្តើមបិទ នេះបើយោងតាមសេចក្តីថ្លែងការណ៍ដែលដាក់កាលពីថ្ងៃអង្គារក្នុងតុលាការដោយក្រសួងយុត្តិធម៌សហរដ្ឋអាមេរិក។

ក្រសួងយុត្តិធម៌កាលពីសប្តាហ៍មុននៅក្នុងបណ្ដឹងតុលាការដាច់ដោយឡែកមួយ បានប៉ាន់ប្រមាណថាតួលេខនេះគឺយ៉ាងហោចណាស់ ៤.២៧៨នាក់។ចំនួនដែលបានបាត់បង់គឺដោយសារតែផលប៉ះពាល់នៃកម្លាំងពលកម្មរបស់រដ្ឋាភិបាលអាមេរិក។ ទីភ្នាក់ងារអាមេរិកបានជួលជនស៊ីវិលប្រហែល ២លាននាក់នៅពេលរដ្ឋបាលលោក Trump ចាប់ផ្តើម។

រដ្ឋាភិបាលត្រូវបានបិទដោយសារតែលោក Trump និងសមាជិកសភា បានបរាជ័យក្នុងការយល់ព្រមលើផែនការចំណាយសម្រាប់ទីភ្នាក់ងារសហព័ន្ធ។លោក Trump កំពុងព្យាយាមដាក់សម្ពាធលើក្រុមប្រជាធិបតេយ្យ ឱ្យទទួលយកផែនការចំណាយរបស់លោកដោយបណ្តេញបុគ្គលិកសហព័ន្ធ និងកាត់កម្មវិធីដែលលោកនិយាយថា ក្រុមប្រជាធិបតេយ្យពេញចិត្ត។ 

លោកTrump បាននិយាយកាលពីសប្តាហ៍មុនថាលោកនឹងកាត់បន្ថយកម្មវិធីរបស់គណបក្សប្រជាធិបតេយ្យបើគណបក្សនេះបដិសេធមិនលុបចោលការទាមទាររបស់ខ្លួនលើការឧបត្ថម្ភធនថែទាំសុខភាព។គួរបញ្ជាក់ថា គណបក្សសាធារណរដ្ឋរបស់លោក Trump មានសំឡេងភាគច្រើននៅក្នុងសភាទាំងពីរ ប៉ុន្តែក៏ត្រូវការការបោះឆ្នោតគាំទ្រពីខាងបក្សប្រជាធិបតេយ្យនៅក្នុងព្រឹទ្ធសភាអាមេរិកផងដែរ ដើម្បីអនុម័តវិធានការណាមួយ ដែលនឹងផ្តល់មូលនិធិថ្មីឈានទៅរកការបើកដំណើរការរដ្ឋាភិបាលឡើងវិញ៕