ទីភ្នាក់ងារសារព័ត៌មានរដ្ឋរបស់ប្រទេសស៊ីរីរាយការណ៍ថា ប្រធានាធិបតីប្រទេសស៊ីរី លោក Ahmed al-Sharaa នឹងធ្វើទស្សនកិច្ចនៅប្រទេសរុស្ស៊ីនៅថ្ងៃពុធនេះ ដើម្បីជួបជាមួយលោកប្រធានាធិបតី Vladimir Putin ជាផ្នែកមួយនៃការជំរុញផ្នែកការទូតដ៏ទូលំទូលាយ ដើម្បីពង្រឹងភាពស្របច្បាប់ជាអន្តរជាតិរបស់រដ្ឋាភិបាលអន្តរកាលទីក្រុងដាម៉ាស។

វានឹងក្លាយជាដំណើរទស្សនកិច្ចផ្លូវការលើកដំបូងរបស់ លោក al-Sharaa ទៅកាន់ទីក្រុងមូស្គូ ដែលជាសម្ព័ន្ធមិត្តដ៏យូរលង់របស់អតីតរបប លោក Bashar al-Assad ដែលកងកម្លាំងរបស់ លោក al-Sharaa បានបណ្តេញចេញកាលពីខែធ្នូ។

ទីភ្នាក់ងារសារព័ត៌មាន SANA របស់ប្រទេសស៊ីរី បានរាយការណ៍កាលពីថ្ងៃអង្គារដោយដកស្រង់សម្តីរបស់អង្គភាពប្រព័ន្ធផ្សព្វផ្សាយរបស់ប្រធានាធិបតីថា ក្នុងអំឡុងដំណើរទស្សនកិច្ចនេះ លោក al-Sharaa និងលោក Putin នឹងពិភាក្សាអំពី «ការវិវឌ្ឍន៍ក្នុងតំបន់ និងអន្តរជាតិ» និង «វិធីពង្រឹងកិច្ចសហប្រតិបត្តិការ»។ សេចក្តីរាយការណ៍បាននិយាយថា លោក Al-Sharaa ក៏នឹងជួបជាមួយសមាជិកនៃសហគមន៍ស៊ីរីដែលរស់នៅក្នុងប្រទេសរុស្ស៊ីផងដែរ។

ទីភ្នាក់ងារសារព័ត៌មាន Reuters បានដកស្រង់សម្តីមន្ត្រីស៊ីរីដែលបាននិយាយថា លោក al-Sharaa នឹង ពិភាក្សាស្តីពីវត្តមាននៅបន្តនៃមូលដ្ឋានកងទ័ពជើងទឹករបស់រុស្ស៊ីនៅតំបន់ Tartous និងមូលដ្ឋានទ័ពអាកាសរបស់ប្រទេសនេះនៅតំបន់ Khmeimim ។ ប្រភពព័ត៌មានបាននិយាយបន្ថែមថា លោក al-Sharaa ក៏មានផែនការស្នើសុំជាផ្លូវការឱ្យទីក្រុងមូស្គូប្រគល់ខ្លួនលោក al-Assad ដែលកំពុងរស់នៅក្នុងការនិរទេសជាមួយគ្រួសារក្នុងទីក្រុងមូស្គូចាប់តាំងពីការភៀសខ្លួនចេញពីប្រទេសស៊ីរី ក្នុងខែធ្នូ។