ប្រទេសបូលីវី កំពុងរកមធ្យោបាយដោះស្រាយកង្វះប្រេងឥន្ធនៈធ្ងន់ធ្ងរ ដែលបានធ្វើឱ្យជាប់គាំងវិស័យសំខាន់ៗនៃសេដ្ឋកិច្ច និងបានបង្កឱ្យមានការតវ៉ានិងភាពតានតឹងផ្នែកនយោបាយកាន់តែខ្លាំងឡើងនៅប៉ុន្មានថ្ងៃមុនការបោះឆ្នោតជ្រើសរើសប្រធានាធិបតីរបស់ប្រទេសដែលគ្រោងធ្វើនៅថ្ងៃទី១៩ ខែតុលា។

ជួរដ៏វែងនៃយានយន្តរង់ចាំចាក់ប្រេងម៉ាស៊ូតនិងប្រេងសាំងបានកើតមាននៅទូទាំងទីក្រុងធំៗ ដោយអ្នកបើកបរមួយចំនួនត្រូវរង់ចាំជាច្រើនថ្ងៃដើម្បីចាក់ប្រេង។ នៅទីក្រុង El Alto វីដេអូថតដោយយានដ្រូនបានបង្ហាញពីជួរដ៏វែងនៅស្ថានីយ៍បម្រើសេវាប្រេងឥន្ធនៈ ខណៈនៅក្នុងទីក្រុង Cochabamba សហជីពដឹកជញ្ជូនបានចាប់ផ្តើមបិទផ្លូវ និងដើរដង្ហែរក្បួនទាមទារឱ្យរដ្ឋាភិបាលមានចំណាត់ការបន្ទាន់។

យោងតាមប្រព័ន្ធផ្សព្វផ្សាយ Bolivian El Deber បានឲ្យដឹងថា នៅទីក្រុង Santa Cruz រថយន្តដឹកប្រេងប្រហែល៦០០គ្រឿងផ្ទុកដោយប្រេងម៉ាស៊ូត និងប្រេងសាំង នៅតែឈប់ស្ងៀមរយៈពេលជាច្រើនថ្ងៃរង់ចាំការអនុញ្ញាតឱ្យចូលនិងទម្លាក់ប្រេងនៅរោងចក្រចម្រាញ់ប្រេង Palmasola ដែលផ្ទុកប្រេងឥន្ធនៈរួមគ្នាប្រហែល២០លានលីត្រ ដែលគ្រប់គ្រាន់សម្រាប់ផ្គត់ផ្គង់ប្រទេសក្នុងរយៈពេល៦ទៅ ៨ ថ្ងៃ។ ក្រុមហ៊ុនប្រេងរដ្ឋ YPFB បានទទួលស្គាល់ថាការពន្យារពេលក្នុងការទម្លាក់ប្រេងគឺដោយសារតែការបង់ប្រាក់នៅមិនទាន់បានសងនៅឡើយទៅឲ្យក្រុមហ៊ុនផ្គត់ផ្គង់។

នៅក្នុងទីក្រុង Santa Cruz ការដឹកជញ្ជូនសាធារណៈត្រឹមតែ៦០ភាគរយប៉ុណ្ណោះនៅបម្រើសេវា ដោយសារតែកង្វះប្រេងឥន្ធនៈ។ ក្នុងចំណោមឧស្សាហកម្មដែលរងផលប៉ះពាល់ដោយកង្វះប្រេងឥន្ធនៈមានវិស័យសំខាន់ៗដូចជាវិស័យដឹកជញ្ជូន សំណង់ និងកសិកម្ម។