ជាបន្តបន្ទាប់ ក្រោយពីបានឃើញញត្តិបន្ទាន់របស់គណៈកម្មាធិការសិទ្ធិមនុស្សកម្ពុជា (គ.ស.ម.ក.) ដាក់បណ្តឹងទៅឧត្តមស្នងការអង្គការសប្រជាជាតិទទួលបន្ទុកសិទ្ធិមនុស្ស (OHCHR) នៅទីក្រុងហ្សឺណែវ ប្រទេសស្វីសពាក់ព័ន្ធទៅនឹងការប្រើប្រាស់សំឡេងរំខាន បំភិត​បំភ័យ​ និងយាយីផ្លូវចិត្តដល់ប្រជាជនកម្ពុជានៅភូមិព្រៃចាន់ និងភូមិជោគជ័យ ឃុំអូរបីជាន់ ស្រុក​អូរជ្រៅ ខេត្តបន្ទាយមានជ័យ បក្សនយោបាយ អ្នកឃ្លាំមើលសិទ្ធិមនុស្ស និង សមាជិក​ព្រឹទ្ធ​សភា​ថៃ ​បានជំរុញឱ្យក្រសួងការបរទេសថៃ ពិនិត្យមើលករណីយនេះ ខណៈការ​ប្រើប្រាស់​សំឡេង​បំភិត​បំភ័យ​បែប​នេះជាការរំលោភសិទ្ធិមនុស្សយ៉ាងធ្ងន់ធ្ងរ។

តាមសេចក្ដីជូនដំណឹងរបស់ គណៈកម្មាធិការសិទ្ធិមនុស្សកម្ពុជា (គ.ស.ម.ក.) បានឱ្យដឹងថា យោង​តាម​កាសែត Khaosod English ចុះថ្ងៃទី១៤ ខែតុលា ឆ្នាំ២០២៥ អំពីការលើកឡើងរបស់ លោក Kannavee Suebsaeng ប្រធានគណបក្សយុត្តិធម៌ និងលោក Natthapong Nat Ruangpanywauth ប្រធានគណបក្សប្រជាជន លើករណីការប្រើប្រាស់សំឡេងរំខាន ដែល​ជា​ទម្រង់​នៃ​ការបំភិតបំភ័យ និង យាយីផ្លូវចិត្តប្រជាជនកម្ពុជា នៅតាមបណ្តោយព្រំដែនកម្ពុជា-ថៃ គឺ​ជាការ​រំលោភ​សិទ្ធិមនុស្ស និងច្បាប់ អន្តរជាតិយ៉ាងធ្ងន់ធ្ងរ។

គណៈកម្មាធិការសិទ្ធិមនុស្សកម្ពុជា គូសបញ្ជាក់ថា នេះគឺជាបុគ្គលទី៤ និងទី៥ ហើយបន្ទាប់ពី​លោក​ជំទាវ Angkhana Neelapaijit សមាជិកព្រឹទ្ធសភាប្រទេសថៃ និងឧត្តមមន្ត្រី​នៃ​ការិយាល័យ​មហា​អយ្យការ លោក Sunai Phasuk ទីប្រឹក្សាអង្គការឃ្លាំមើល​សិទ្ធិ​មនុ​ស្ស​ប្រចាំ​ប្រទេស​ថៃ ​ដោយបានទទួលស្គាល់ថា ជាការរំលោភសិទ្ធិមនុស្សយ៉ាងធ្ងន់ធ្ងរ ក្រោមអនុសញ្ញា​ប្រឆាំង​ទារុណ​កម្ម និងការប្រព្រឹត្តមកលើខ្លួន ឬ ទណ្ឌកម្មឯទៀតដែលឃោរឃៅ អមនុស្សធម៌ ឬ​បន្ថោកបន្ទាប (CAT)។

គណៈកម្មាធិការសិទ្ធិមនុស្សកម្ពុជា បានដកស្រង់ខ្លឹមសារការលើកឡើងរបស់ លោក Kavannavee Suebsaeng ដោយលោកបានលើកឡើងថា៖«ការប្រើប្រាស់ធុងបាស់ ក្នុង​ការ​បន្លឺ​សំឡេង​ ខ្មោច គឺជាការរំលោភសិទ្ធិមនុស្ស និងជាការជាន់ឈ្លីកិត្តិយសមនុស្ស។ ពួក​យើង​គួរ​ត្រឡប់​មក​គោរពតាមកិច្ច ព្រមព្រៀងបទឈប់បាញ់ និងប្រើ​ប្រាស់​វេទិកា​អន្តរជាតិ​ប្រកប​ដោយ​ប្រសិទ្ធ​ភាព​។ លោកបញ្ជាក់ថា ប្រសិនបើគ្មានរឿងនេះកើតឡើង គឺជាការល្អ។ អ្នកលេងបណ្តាញ​សង្គម​ និងយោធា ព្រមទាំងរាជរដ្ឋាភិបាល មិនត្រូវគាំទ្រសកម្មភាពរបៀបនេះឡើយ»។

ចំណែក លោក Natthapong Ruangpanywauth បានព្រមាន​ថា​ «សកម្ម​ភាព​ប្រើ​ប្រាស់​ធុង​បាស់​ចាក់ សំឡេងខ្មោច និងយន្តហោះចម្បាំងទោះបីជាក្នុងគោលបំណងអ្វីក៏ដោយ គឺប៉ះ​ពាល់​ដល់​ផ្លូវ​ចិត្តរបស់ប្រជាជនកម្ពុជា រំលោភច្បាប់អន្តរជាតិ និងធ្វើឱ្យខូច​មុខ​មាត់​ប្រទេស​ថៃ​លើ​ឆាក​អន្តរជាតិ​។ លោកបានបញ្ជាក់បន្ថែមថា ដោយតំបន់នោះស្ថិតក្រោមច្បាប់អាជ្ញាសឹក រាជរដ្ឋាភិបាល និងយោធាត្រូវទទួលខុសត្រូវ ក្នុងការទប់ស្កាត់សកម្មភាព ដែលអាច​បង្កើន​ភាព​តាន​តឹង​»។

ចំណែក លោកជំទាវ Angkhana Neelapaijit សមាជិក​ព្រឹទ្ធសភា​ប្រទេស​ថៃ​ក៏​បាន​បញ្ជាក់​ដែរ​ថា «រាជ​រដ្ឋាភិបាលថៃ គួរតែបានដឹងថារាល់សកម្មភាពទាំងឡាយណាបង្កឱ្យមានអារម្មណ៍ភ័យខ្លាច ឬប៉ះ​ពាល់​ដល់ផ្លូវចិត្តរបស់ប្រជាជនទោះបីជាអ្នកស្ថិតក្នុងស្ថានភាពជម្លោះក៏ដោយ ជាពិសេស​ក្រុម​ងាយ​រង​គ្រោះ ដែលអាចជាការធ្វើទារុណកម្មផ្លូវចិត្តក្រោមអនុសញ្ញាប្រឆាំងទារុណកម្ម និង​ការ​ប្រព្រឹត្ត​មកលើខ្លួន ឬទណ្ឌកម្ម ឯទៀតដែលឃោរឃៅ អមនុស្សធម៌ ឬបន្ថោកបន្ទាប (CAT) ដែល​ប្រទេសថៃជារដ្ឋភាគី។ លោកជំទាវ បានជំរុញឱ្យក្រសួងការបរទេសរបស់ប្រទេសថៃ ពិនិត្យ​មើល​លើ​ករណីដែលជនល្បីឈ្មោះតាមបណ្តាញសង្គម បានប្រើប្រាស់សំឡេងខ្មោច នៅតាម​ព្រំដែន​ថៃ​ចូលទៅក្នុងប្រទេសកម្ពុជា»។

ជាមួយគ្នានេះទីប្រឹក្សាអង្គការឃ្លាំមើលសិទ្ធិមនុស្សប្រចាំប្រទេសថៃ លោក Sunai Phasuk ទទួល​ស្គាល់ថាការប្រើប្រាស់សំឡេងរំខាន ជាទម្រង់នៃការបំភិតបំភ័យ និង​យាយី​​ផ្លូវ​ចិត្ត​ប្រជាជន​កម្ពុជា នៅព្រំដែនកម្ពុជា-ថៃ ដែលទង្វើទាំងនេះជាការរំលោភសិទ្ធិមនុស្សយ៉ាងធ្ងន់ធ្ងរ ក្រោម​អនុ​សញ្ញា​ប្រឆាំង​ទារុណ​កម្ម និងការប្រព្រឹត្តមកលើខ្លួន ឬទណ្ឌកម្មឯទៀតដែល ឃោរឃៅ អមនុស្ស​ធម៌ ឬបន្ថោកបន្ទាប (CAT)។

សូម​បញ្ជាក់ថា គណៈកម្មាធិការសិទ្ធិមនុស្សកម្ពុជា កាលពីថ្ងៃទី១១ ខែតុលានេះ បាន​ដាក់​បណ្តឹង​ទៅ​ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅទីក្រុងហ្សឺណែវ ប្រទេស​ស្វ៊ីស អំពីការប្រើប្រាស់​សំឡេង​រំខាន​របស់​យោធាថៃ​មក​លើ​ប្រជាជន​កម្ពុជា​នៅ​ភូមិ​ជោគជ័យ និងព្រៃចាន់ ហើយក៏បាន​អញ្ជើញ​ឧត្តម​ស្នងការ​នេះ​ចុះម​ក​សង្កេត​ការណ៍​ដោយ​ផ្ទាល់​អំពី​ការ​រំលោភសិទ្ធិមនុស្ស ពីសំណាក់យោធាថៃមកលើប្រជាពលរដ្ឋកម្ពុជា៕