ទិន្នន័យពីក្រុមហ៊ុនស្រាវជ្រាវទីផ្សារសកល Rho Motion បាននិយាយនៅថ្ងៃពុធ (១៥ តុលា) នេះថា ការលក់រថយន្តអគ្គិសនីសុទ្ធ (EV) និងអគ្គិសនីលាយសាំងហាយប្រ៊ីដ (Hybrid) នៅទូទាំងពិភពលោក បានកើនឡើង ២៦% ក្នុងខែកញ្ញាធៀបនឹងឆ្នាំមុន ដល់កំណត់ត្រាខ្ពស់ចំនួន ២,១លានគ្រឿង ដែលជំរុញដោយតម្រូវការខ្លាំងនៅប្រទេសចិន និងការប្រញាប់ទិញឱ្យបានមុនដាច់ពន្ធក្នុងស្រុករបស់អាមេរិក។

លោក Charles Lester ប្រធានគ្រប់គ្រងទិន្នន័យរបស់ Rho Motion បាននិយាយថា ចិន មានចំនួនប្រហែល ២ ភាគ ៣ នៃការលក់ទូទាំងពិភពលោក ក្នុងចំនួនប្រហែល ១,៣លានគ្រឿង ខណៈអាមេរិកខាងជើងក៏បានឈានដល់កំណត់ត្រាមួយផងដែរ នៅពេលអ្នកទិញរបស់សហរដ្ឋអាមេរិក បានសម្រុកទិញរថយន្ត មុនពេល "ពន្ធអាករលើកទឹកចិត្ត" ផុតកំណត់។

គិតជាតួលេខក្នុងខែកញ្ញា — ការលក់រថយន្តរបស់ចិន បានកើនឡើងប្រហែល ១,៣លានគ្រឿង ហើយការលក់នៅអឺរ៉ុប កើនបាន ៣៦% ដល់ ៤២៧,៥៤១គ្រឿង ខណៈការលក់នៅអាមេរិកខាងជើង កើនឡើង ៦៦% ដល់ប្រហែល ២១៥.០០០គ្រឿង ចំណែកការលក់សរុបនៅកន្លែងផ្សេងទៀតទូទាំងពិភពលោក បានកើនឡើង ៤៨% ដល់ ១៥៣.៥៩៤គ្រឿង។

ចិនគឺជាទីផ្សាររថយន្តដ៏ធំបំផុតរបស់ពិភពលោក ហើយមានចំនួនច្រើនជាងពាក់កណ្តាលនៃការលក់រថយន្ត EV សកល នៅក្នុងទិន្នន័យរបស់ Rho Motion រួមមានរថយន្តអគ្គិសនីសុទ្ធ និងហាយប្រ៊ីដ។ ជាធម្មតា ខែកញ្ញាជាខែដ៏មមាញឹកបំផុតរបស់ចិន សម្រាប់ការទិញរថយន្ត ដោយសារអ្នកទិញសម្រុក "ដូរចាស់យកថ្មី" (Trade-in) ក្រោមការឧបត្ថម្ភធនពាណិជ្ជកម្ម មុនពេលតំបន់មួយចំនួនចាប់ផ្តើមបញ្ឈប់អត្ថប្រយោជន៍ទាំងនេះ៕