រដ្ឋាភិបាល ត្រូវបានរាយការណ៍ថា បានសម្រេចលុបចោលគម្រោងដាក់ទណ្ឌកម្ម សម្រាប់ថ្ងៃពុធ (ទី១៥ ខែតុលា) នេះ ជាចំណាត់ការដែលត្រូវបានកំណត់រួមបញ្ចូលការកម្រិតលំហូរជំនួយមនុស្សធម៌ និងបិទខ្ទប់ច្រកព្រំដែន Rafah រវាងតំបន់ហ្កាហ្សា និងប្រទេសអេហ្ស៊ីប។

វិធានការនេះត្រូវបានប្រកាស កាលពីថ្ងៃអង្គារ បន្ទាប់ពីក្រុមហាម៉ាស ដំបូងឡើយបានប្រគល់អដ្ឋិធាតុនៃចំណាប់ថ្នូរតែ ៤នាក់ ក្នុងចំណោមចំនួន ២៨នាក់ដែលត្រូវបានឃុំខ្លួននៅក្នុងតំបន់ហ្កាហ្សាស្ទ្រីប ដោយក្រុមភេរវករប៉ាឡេស្ទីន។

ហើយយោងតាមប្រព័ន្ធផ្សព្វផ្សាយសាធារណៈ Kan បានឲ្យដឹងថា ថ្នាក់ដឹកនាំបានលុបចោលចំណាត់ការនេះ ដោយសារតែកាលពីយប់ថ្ងៃអង្គារ ក្រុមហាម៉ាសបានប្រគល់ត្រឡប់វិញនូវអ្វីដែលខ្លួនអះអាងថា ជាសាកសពចំណាប់ថ្នូរ ៤នាក់ទៀត។ សាកសពទាំងនោះត្រូវបានយកទៅស្ថាប័នធ្វើកោសល្យវិច័យ ដែលដំណើរការកំណត់អត្តសញ្ញាណ អាចចំណាយពេលដល់ទៅ ២ថ្ងៃ។ ក្រុមហាម៉ាសមិនបានប្រាប់ឈ្មោះសាកសពចំណាប់ថ្នូរទាំង ៤រូបនេះទេ។

លើសពីនេះទៀត អ្នកការទូតមជ្ឈិមបូព៌ា និងប្រភពទី២ ដែលដឹងពីបញ្ហានេះ បានប្រាប់សារព័ត៌មាន The Times of Israel ថា ក្រុមហាម៉ាសបានជូនដំណឹងដល់អ្នកសម្រុះសម្រួលថា ខ្លួននឹងប្រគល់សាកសពចំណាប់ថ្នូរ ៤បួននាក់បន្ថែមទៀតទៅអ៊ីស្រាអែល នៅយប់ថ្ងៃពុធនេះ។

ហេតុដូច្នេះ បើយោងតាមប្រព័ន្ធផ្សព្វផ្សាយ Kan បានឲ្យដឹងថា ច្រកឆ្លងកាត់ Rafah នឹងបើកឡើងវិញនៅថ្ងៃពុធនេះ ហើយជំនួយមនុស្សធម៌ នឹងត្រូវបានអនុញ្ញាតឲ្យចូលទាំងស្រុងទៅក្នុងតំបន់ហ្កាហ្សា តាមការគ្រោងទុក៕